புலிகளின் தாக்குதலில் மரணித்த இராணுவ அதிகாரியின் நினைவாக ஒட்டுசுட்டான் காட்டில் மரநடுகை!

புலிகளின் கட்டுப்பாட்டில் இருந்த முல்லைத்தீவு- மாங்குளம் வீதியில் உள்ளட காட்டுப் பகுதிக்குள் ஊடுருவிய போது, விடுதலைப்புலிகளின் தாக்குதலில் உயிரிழந்த இலங்கை இராணுவத்தின் ஆழ ஊடுருவும் படையணியின் தளபதியான லெப்.கேணல் லலித் ஜெயசிங்கவின் நினைவாக, நேற்று ஒட்டுசுட்டான் காட்டு பகுதியில், மரக்கன்றுகள் நடப்பட்டன.

முல்லைத்தீவு, ஒட்டுசுட்டான் காட்டு பகுதியில், லலித் ஜெயசிங்க உயிரிழந்த இடத்தில்- அவரது மனைவி, மகள், பெற்றோரால் மரக்கன்றுகள் நடப்பட்டன. அடர்ந்த காட்டுக்குள், ஜி.பி.எஸ் துணையுடன் சுமார் 2.7 கிலோமீற்றர் தூரம் நடந்து சென்றே, அவர் கொல்லப்பட்ட இடத்தை இந்த குழு அடைந்தது. மாவட்ட பிரதிப் பொலிஸ்மா அதிபர், 4 வது புலனாய்வு படையணி என்பவனவற்றின் வழிகாட்டலில், ஜெயசிங்கவின் அஞ்சலி நிகழ்வு நடந்தது.

படைத்தரப்பினர், அவர் உயிரிழந்த இடத்திற்கு வழிகாட்டிச் சென்றனர். சம்பவம் நடந்த இடம், ஆழ ஊடுருவும் படையணியினர் புலிகளின் பகுதிக்கு சென்று தங்கியிருக்கும் தரிப்பிடமாக இருந்ததால், அதன் புவியியல் அமைவிடம் ஜி.பி.எஸ் மூலம் சுலபமாக கண்டறியப்பட்டிருந்தது. அடர்ந்த காட்டுக்குள், ஜெயசிங்க உயிரிழந்த இடத்தில் மௌன அஞ்சலி செலுத்தி, சில மரங்கள் நாட்டப்பட்டுள்ளன.