பொலிஸார் என கூறிக்கொண்டு கை விலங்குடன் வீட்டுக்குள் நுழைந்த கொள்ளை கும்பல்! வீட்டிலிருந்தவர்களை கட்டி வைத்துவிட்டு கொள்ளை..

பொலிஸாரின் வேடத்தில் கை விலங்குகளுடன் வீட்டுக்குள் நுழைந்த கொள்ளை கும்பல் வீட்டு உரிமையாளரை அச்சுறுத்தி பல கோடி மதிப்பிலான தங்க நகைகள், மற்றும் பணம் ஆகியவற்றை கொள்ளையடித்து தப்பிச் சென்றுள்ளது. 

குறித்த சம்பவம் கொட்டாஞ்சேனை பகுதியில் இடம்பெற்றுள்ளது. சுமார் ஒன்றரை கோடி ரூபா பெறுமதியான தங்க நகைகளையும் சுமார் பதினைந்து இலட்சம் ரூபா பணத்தையும் இந்தக் கொள்ளையர்கள் திருடிச் சென்றுள்ளதாக பொலிஸார் தெரிவித்துள்ளனர்.

வெள்ளைச் சட்டை மற்றும் மிடுக்கான உடையணிந்து குறித்த வர்த்தகரின் கதவை தட்டி வீட்டிற்குள் நுழைந்த கொள்ளையர்கள் வீட்டில் இருந்த பெண்ணின் கைகளை கட்டி மிரட்டியுள்ளனர். 

பின்னர் இரண்டு கொள்ளையர்களும் வீட்டின் உரிமையாளர்களான தம்பதியரை ஒரு அறைக்கு அழைத்துச் சென்று தங்களிடம் துப்பாக்கி இருப்பதாக கூறி மிரட்டி, அறையில் இருந்த அலமாரியில் இருந்த தங்கம் மற்றும் பணத்தை திருடிச் சென்றுள்ளனர்.

மேலும் தம்பதியரை அறையில் வைத்து பூட்டி விட்டு வீட்டின் பிரதான நுழைவாயில் வழியாகவே கொள்ளையர்கள் வெளியேறியுள்ளனர். பின்னர் இது குறித்து வீட்டின் உரிமையாளர்கள் பொலிஸில் முறைப்பாடு செய்ததாக தெரிவிக்கப்படுகிறது .