கொழும்புத்துறை சூடு:போதைபொருள் வியாபார பின்னணி!

அரியாலை மணியந்தோட்டம் பகுதியில் இளைஞரொருவர் சுட்டுக் கொல்லப்பட்ட சம்பவம் போதைபொருள் கடத்தலுடன் சம்பந்தப்பட்டதென அதிரடிப்படையின் உள்ளக தகவலகள் தெரிவிக்கன்றன.

இது தொடர்பான வழக்கின் சந்தேகநபர்களான சிறப்பு அதிரடிப்படையின் புலனாய்வு உத்தியோகத்தர்கள் இருவரின் விளக்கமறியல் மீண்டும் எதிவரும் ஜனவரி 22ஆம் திகதிவரை நீடிக்கப்பட்டுள்ளது.

கடந்த ஒக்டோபர் மாதம் 22ஆம் திகதி அரியாலை கிழக்கு மணியம்தோட்டம் வசந்தபுரம் முதலாம் குறுக்கு வீதிப் பகுதியில் 24 வயதுடைய டொன் பொஸ்கோ டினேசன் என்பவர் துப்பாக்கிச் சூட்டுக்கு இலக்காகி உயிரிழந்தார். 

இளைஞர் மீது மேற்கொள்ளப்பட்ட துப்பாக்கிச் சூட்டு சம்பவம் தொடர்பான விசாரணைகளை கொழும்பு குற்றத் தடுப்பு பிரிவினரால் மேற்கொள்ளப்பட்டு வருகின்றது.

இந்தக் கொலைச் சம்பவத்துடன் தொடர்புடையவர்கள் என்ற குற்றச்சாட்டில் சிறப்பு அதிரடிப்படையின் புலனாய்வு அதிகாரி உள்பட இருவர் கைது செய்யப்பட்டு நீதிமன்றக் கட்டளையின் பிரகாரம் விளக்கமறியலில் வைக்கப்பட்டிருந்தனர்.

சந்தேகநபர்கள் யாழ்ப்பாண நீதிமன்ற நீதிவான் சின்னத்துரை சதீஸ்தரன் முன்னிலையில் இன்று முற்படுத்தப்பட்டனர். 

குற்றப்புலனாய்வுப் பிரிவினரின் விசாரணைகள் தொடர்வதாக மன்றுக்கு அறிவிக்கப்பட்டது. அதனால் சந்தேகநபர்கள் இருவரையும் ஜனவரி 22ஆம் திகதிவரையும் விளக்கமறியலில் வைக்குமாறு நீதிவான் கட்டளையிட்டுள்ளார்.

போதைபொருள் கடத்தப்படுவதாக தெரியவந்த தகவல் ஒன்றினையடுத்து அங்கு சென்ற அதிரடிப்படையினர் குறித்த உயிரிழந்தவரை வழிமறித்து சோதனை நடத்த முற்பட்டதாக தெரிவிக்கப்படுகின்றது.

எனினும் இதற்கு ஒத்துழைக்காத நிலையில் துப்பாக்கி சூடு நடத்தப்பட்டுள்ளது.