பிரிகேடியர் பிரியங்கவை கைது செய்யக் கோரி வெஸ்ட்மினிஸ்டர் நீதிமன்றம் முன் போராட்டம்!

கொலை அச்சுறுத்தல் விடுத்தார் என்ற குற்றச்சாடப்பட்டுள்ள பிரிகேடியர் பிரியங்க பெர்னாண்டோவிற்கு எதிராக புலம்பெயர் தமிழர்கள் இன்று வெஸ்ட்மினிஸ்டர் நீதிமன்றுக்கு முன்பாக போராட்டத்தில் ஈடுபட்டனர்.

பிரிகேடியர் பிரியங்க பெர்னாண்டோ மீதான வழக்கு விசாரணை வெஸ்ட்மினிஸ்டர் நீதிமன்றில் இன்று நடைபெறவுள்ள நிலையில் நீதிமன்றத்திற்கு வெளியே புலம்பெயர் தமிழர்களால் போராட்டம் முன்னெடுக்கப்பட்டது.

இதன்போது பிரியங்க பெனாண்டோவுக்கு எதிரான வழக்கில் அரசியல் அழுத்தத்தை எதிர்த்தும் குறித்த நபரை கைது செய்ய வேண்டும் எனக் போராட்டத்தில் ஈடுபட்டவர்கள் கோரிக்கை விடுத்துள்ளனர்.

கடந்த ஆண்டு பிரித்தானியாவிலுள்ள இலங்கை தூதரகத்திற்கு முன்னால் புலம்பெயர் தமிழர்களால் முன்னெடுக்கப்பட்ட ஆர்ப்பாட்டத்தின்போது, பிரிகேடியர் பிரியங்க பெர்ணான்டோ அவர்களை அச்சுறுத்தியதாக குற்றம்சாட்டப்பட்டது. குறிப்பாக கழுத்தை அறுக்கும் வகையிலான சைகை காட்டப்பட்ட காணொளி வெளியாகி பாரிய சர்ச்சைகளை ஏற்படுத்தியிருந்தது.

இந்த சம்பவம் தொடர்பாக கடந்த விசாரணையின்போது, புலம்பெயர் தமிழர்களை கழுத்தை அறுக்கும் சைகையை காண்பித்து அச்சுறுத்தல் விடுத்த செயலானது இலங்கை இராணுவ அதிகாரியான பிரிகேடியர் பிரியங்க பெர்னாண்டோவின் கடமையுடன் தொடர்புடையதல்ல என வெஸ்ட்மினிஸ்டர் நீதிமன்றம் அறிவித்துள்ளது.