அவுஸ்ரேலியாவின் குயின்ஸ்லாந்து மாநிலத்தில் கடும் வெள்ளம் : இருவர் உயிரிழப்பு!

அவுஸ்ரேலியாவின் குயின்ஸ்லாந்து மாநிலத்தில் ஏற்பட்ட கடும் வெள்ளத்தில் சிக்கி இருவர் உயிரிழந்துள்ளனர். குறித்த பகுதியில் வெள்ள நீர் வடிந்தோடி வருகின்ற நிலையில், சடலங்கள் இன்று (செவ்வாய்க்கிழமை) கண்டெடுக்கப்பட்டதாக அதிகாரிகள் தெரிவித்துள்ளனர். 

வெள்ளத்தில் சிக்கி உயிரிழந்தவர்கள் இருவரும் 20 வயது மதிக்கத்தக்கவர்கள் என்றும் தெரிவிக்கப்பட்டுள்ளது. வெள்ள பாதிப்புகளில் சிக்கி 21 மற்றும் 23 வயதுடைய இருவர் காணாமல் போயுள்ளதாக பொலிஸார் நேற்று தெரிவித்திருந்தனர். இந்நிலையிலேயே இன்று குறித்த இருவரது சடலங்கள் கண்டெடுக்கப்பட்டுள்ளன.

இந்நிலையில், காணாமல் போனவர்களும், உயிரிழந்தவர்களும் ஒரே நபர்களா என்பது தொடர்பான விசாரணைகளை குயின்ஸ்லாந்து பொலிஸார் மேற்கொண்டு வருகின்றனர்.

ஒரு வாரத்திற்கு மேலாக மழை நீடித்து வெள்ளப்பெருக்கு ஏற்பட்டுள்ள நிலையில், பதினோறாவது நாளான இன்று வெள்ளம் சற்று வடிந்து வருவதாக தெரிவிக்கப்படுகிறது. வெள்ள அனர்த்தத்தினால் ஆயிரக்கணக்கான மக்கள் பாதிக்கப்பட்டுள்ளதுடன், தங்கள் வீடுகளுக்கு திரும்ப முடியாது தவித்து வருகின்றமை குறிப்பிடத்தக்கது.