காதலி புகைப்படத்தை கோபிநாத் முகநூலில் பதிவிட்டார் : துப்பாக்கிச்சூட்டில் உயிரிழந்த இளைஞன்

முல்லைத்தீவு புதுக்குடியிருப்பு பகுதியில் இடம்பெற்ற வாள்வெட்டு, துப்பாக்கிச்சூட்டில் ஒரு இளைஞன் உயிரிழந்திருந்தார். இந்த சம்பவத்தின் முழுமையான பின்னணி வெளியாகியுள்ளது.

கைவேலி மருதமடு குளம் பகுதியில் (11.09.18) அன்று இரவு ஆறுபேர் கொண்ட குழுவினர் வீடு புகுந்து வாள்வெட்டில் ஈடுபட்டனர். இதன்போது நாட்டு துப்பாக்கியை பாவித்து மேற்கொள்ளப்பட்ட துப்பாக்கிசூட்டில் காயமடைந்த புதுக்குடியிருப்பு இளைஞன் அனுராதபுரம் மருத்துவமனையில் சிகிச்சை பலனின்றி உயிரிழந்துள்ளார்.

இந்த சம்பவம் பற்றிய முழுமையான விபரம் வெளியாகியுள்ளது.

புதுக்குடியிருப்பு சிவநகரினை சேர்ந்த இளைஞன் ஒருவர் மாணிக்கபுரத்தினை சேர்ந்த யுவதி ஒருவரை காதலித்து திருமணம் செய்துள்ளார். குறித்த யுவதி ஏற்கனவே கைவேலி மருதமடுகுளம் பகுதியினை சேர்ந்த செ.கோபிநாத் என்ற இளைஞனை காதலித்துள்ளார்.

தன்னை கைவிட்டு, இன்னொரு இளைஞனை அந்த யுவதி திருமணம் செய்ததால் கோபமடைந்த கோபிநாத், காதலியுடன் இருந்த புகைப்படத்தை முகநூலில் பதிவிட்டார். இதனால் அதிர்ச்சியடைந்த முன்னாள் காதலயின் கணவன், அந்த படங்களை உடனடியாக முகநுலில் இருந்து நீக்கும்படி வற்புறுத்தி வந்துள்ளதுடன் வாய்த்தர்க்கத்திலும் ஈடுபட்டுள்ளார்.

எனினும், கோபிநாத் அந்த படங்களை முகநூலிலிருந்து அகற்றவில்லை. இதனால் ஆத்திரமடைந்த முன்னாள் காதலியின் கணவர், தனது நண்பர்களுடன் மருதமடுகுளம் பகுதியினை சேர்ந்த செ.கோபிநாத்தின் வீட்டிற்கு கடந்த 11ம் திகதி சென்றுள்ளார்.

வீட்டின் வெளியில் உறங்கிக்கொண்டிருந்த கோபிநாத் மீது முதலில் வாளால் வெட்டியுள்ளனர். பின்னர் அவரது தந்தையான  செல்வக்குமார் (45 வயது) மீதும் வாள்வெட்டு நடத்திவிட்டு, வீட்டுக்குள் புகுந்து தாயாரான செ.குசேலகுமாரி (43) மீதும் வாளால் வெட்டியுள்ளார்கள். இந்தவேளை வீட்டில் இருந்த பெண் பிள்ளைகள் இருவரும் வீட்டின் அறைக்குள் சென்று கதவினை பூட்டிக்கொண்டுள்ளதால் அவர்கள் தப்பித்து கொண்டனர்.

அப்போது வீட்டில் இருந்தவர்கள் நாட்டுத் துப்பாக்கியால் வாள்வெட்டு குழு மீது சூடு நடத்தியுள்ளனர். அதில் ஒருவர் படுகாயமடைந்தார். துப்பாக்கிச் சூட்டையடுத்து, வாள்வெட்டுக்குழு தப்பியோடியது. காயமடைந்தவரையும் இழுத்துக் கொண்டு ஓடியுள்ளனர். சிறிது தூரம் அவரை இழுத்துக் கொண்டு ஓடியவர்கள், வீட்டிலிருந்து சிறிது தூரத்தில் அவரை கைவிட்டுவிட்டு தப்பியோடி விட்டனர்.

கிராம மக்களால் பொலீசாருக்கு தகவல் கொடுக்கப்பட்டது. சம்பவ இடத்திற்கு விரைந்த புதுக்குடியிருப்பு பொலீசார் காயமடைந்த நால்வரையும் புதுக்குடியிருப்பு ஆதார மருத்துவமனையில் அனுமதித்துள்ளார்கள்.

துப்பாக்கிசூட்டிற்கு இலக்கான இளைஞன் முல்லைத்தீவு மாவட்ட மருத்துவமனைக்கு கொண்டுசெல்லப்பட்டு மேலதிக சிகிச்சைக்காக அனுராபுரம் மருத்துவமனை கொண்டு செல்லப்பட்டு அங்கே சிகிச்சை பலனின்றி இன்று காலை (13) மரணமடைந்துள்ளார்.

வாள்வெட்டிற்கு இலக்கான குடும்பத்தினை சேர்ந்த மூவரும் மாவட்ட மருத்துவமனைக்கு மேலதிக சிகிச்சைக்காக அனுமதிக்கப்பட்ட நிலையில் தந்தையாரான செல்வக்குமார் மேலதிக சிகிச்சைக்காக யாழ்ப்பாணம் பொது மருத்துவமனை அனுப்பி வைக்கப்பட்டுள்ளார்.

துப்பாக்கி சூட்டுக்கு இலக்காகி மரணமடைந்தவர் 02ஆம் வட்டாரம் புதுக்குடியிருப்பினை சேர்ந்த 28 அகவையுடைய திருச்செல்வம் கபிலன் என்ற இளைஞனாவார்.

இதேவேளை இந்த வாள்வெட்டு சம்பவத்துடன் தொடர்புடையவர்கள் என சந்தேகிக்கப்படும் மூவரை புதுக்குடியிருப்பு பொலீசார் கைது செய்துள்ளார்கள்.

புதுக்குடியிருப்பு சிவநகரினை சேர்ந்த இளைஞர்கள் இருவரும், ஆனந்தபுரத்தை சேர்ந்த ஒருவருமே கைதாகியுள்ளனர். இவர்கள் மூவரும் 22 வயதானவர்கள். இந்த குழுவினை சேர்ந்த இருவரை கைதுசெய்ய பொலீசார் நடவடிக்கை மேற்கொண்டு வருவதாக தெரிவித்துள்ளார்கள்.

இதேவேளை இந்த சம்பவத்தின் போது துப்பாக்கிசூடு யார் நடத்தினார்கள் என்பது தொடர்பிலும் விசாரணைகள் இடம்பெற்று வருவதாகவும் பொலீசார் தெரிவித்துள்ளனர்.