திரு டெல்லி கணேஷின் திடீர் மறைவு பேரிழப்பு: தவெக தலைவர் விஜய்!

மறைந்த நடிகர் டெல்லி கணேஷிற்கு தமிழக வெற்றிக் கழகத்தின் தலைவர் விஜய் இரங்கல் தெரிவித்துள்ளார். பழம்பெரும் நடிகர் டெல்லி கணேஷ் தனது 80 வயதில் காலமானது தமிழ் திரையுலகை சோகத்தில் ஆழ்த்தியுள்ளது. நடிகர்கள் சிவகுமார், கார்த்தி உட்பட பலர் அவரது உடலுக்கு நேரில் அஞ்சலி செலுத்தி வருகின்றனர்.

டெல்லி கணேஷின் மறைவுக்கு ரஜினிகாந்த் இரங்கல் தெரிவித்த நிலையில், நடிகர் மற்றும் தவெக தலைவர் விஜய் இரங்கல் பதிவிட்டுள்ளார்.

அவர் தனது எக்ஸ் பக்கத்தில், "மூத்த நடிகர் திரு. டெல்லி கணேஷ் அவர்கள் உடல்நலக் குறைவால் காலமான செய்தி, வேதனை அளிக்கிறது. 40 ஆண்டுகளுக்கு மேலாக 400க்கும் அதிகமான திரைப்படங்களில் பல தரப்பட்ட கதாபாத்திரங்களில் நடித்துப் புகழ்பெற்ற அவரது திடீர் மறைவு, தமிழ்த் திரையுலகிற்குப் பேரிழப்பாகும். அவரை இழந்த வாடும் குடும்பத்தினருக்கும், நண்பர்களுக்கும் ஆழ்ந்த இரங்கலைத் தெரிவித்துக் கொள்கிறேன்" என கூறியுள்ளார்.