கடமையில் இருந்த பொலிஸ் உத்தியோகத்தரின் துப்பாக்கியை பறிக்க முயன்றவர் துப்பாக்கி சூட்டில் பலி, பொலிஸ் உத்தியோகத்தர் காயம்..

சீதுவை பொலிஸ் பிரிவிற்குட்பட்ட கொட்டுகொடை வீதி சோதனை சாவடியில் துப்பாக்கி வெடித்ததில் பொலிஸ் சார்ஜன்ட் காயத்திற்கு உள்ளாகியுள்ளதோடு நபரொருவர் உயிரிழந்துள்ளதாக பொலிஸார் தெரிவித்துள்ளனர்.

சீதுவை பொலிஸ் நிலைய அதிகாரிகள் சீதுவை பகுதியிலிருந்து வந்த காரினை சோதனையிட முற்பட்ட போது இந்த சம்பவம் இடம்பெற்றுள்ளதாக பொலிஸார் தெரிவித்துள்ளனர்.

காரின் இடது ஆசனத்தில் அமர்ந்திருந்த நபரொருவர் பொலிஸ் சார்ஜன்ட்டின் கடமை துப்பாக்கியை பறிக்க முற்பட்ட போது, துப்பாக்கி வெடித்ததில் பொலிஸ் அதிகாரியின் காலிலும், 

பறிக்க முற்பட்ட நபரின் வயிற்றிலும் துப்பாக்கிச் சூட்டு காயங்கள் ஏற்பட்டுள்ளதாக பொலிஸார் தெரிவித்துள்ளனர். 

பின்னர் இருவரும் நீர்கொழும்பு வைத்தியசாலையில் அனுமதிக்கப்பட்ட நிலையில் காரில் பயணித்த பூகொடை பிரதேசத்தைச் சேர்ந்த 38 வயதுடைய நபர் சிகிச்சை பலனின்றி உயிரிழந்தார்.

மேலும், சீதுவை பொலிஸார் மேலதிக விசாரணைகளை மேற்கொண்டு வருவதாக தெரிவித்துள்ளனர்.