கடலில் மிதந்த போத்தலில் இருந்த திரவத்தை மதுபானம் என நினைத்து அருந்திய 4 மீனவர்கள் பலி, 2 மீனவர்கள் கவலைக்கிடம்..

கடலில் மிதந்துவந்த போத்தலில் இருந்த திரவத்தை அருந்திய 4 பேர் உயிரிழந்துள்ளனர். தங்காலை மீன்பிடி துறைமுகத்தில் இருந்து படகில் சென்ற 6 மீனவர்கள் மேற்படி மர்ம திரவத்தை அருந்தியதாக கடற்றொழில் திணைக்களத்தின் பணிப்பாளர் நாயகம் சுசந்த கஹவத்த தெரிவித்துள்ளார்.

இந்த மீனவர்கள் 6 பேரும் நேற்றுமுன்தினம் (28) இரவு கடலில் மீன்பிடிக்கச் சென்றபோது கடற்பரப்பில் கண்டெடுத்த திரவத்தை அருந்தியுள்ள நிலையில், அவர்களில் மூவர் உயிரிழந்துள்ளதாகவும் ஏனைய மூவரும் கவலைக்கிடமாக இருப்பதாகவும் நேற்று (29) முற்பகல் தகவல் தெரிவிக்கப்பட்டது. 

இந்நிலையில் கவலைக்கிடமான நிலையில் இருந்த ஏனைய மூன்று மீனவர்களில் மற்றுமொருவர் ஒருவர் சற்று முன் உயிரிழந்துள்ளதாக கூறப்படுகிறது. அதன்படி, ஆறு மீனவர்களில் நால்வர் உயிரிழந்துள்ளதோடு, ஏனைய இரு மீனவர்களின் நிலைமை கவலைக்கிடமாக உள்ளதாகவும், 

அவர்கள் தற்போது வைத்தியசாலையில் சிகிச்சை பெற்று வருவதாகவும் கடற்றொழில் திணைக்களத்தின் பணிப்பாளர் நாயகம் தெரிவித்துள்ளார்.