உள்ளாடைக்குள் மறைத்து வைத்து வெடிபொருட்களை கொண்டு சென்ற பெண் கைது!

வெடிபொருட்களை உள்ளாடையில் மறைத்து வைத்துக்கொண்டு பஸ்ஸில் பயணித்த பெண் ஒருவர் கொட்டவெஹர  பொலிஸாரால் கைது செய்யப்பட்டுள்ளார்.

இந்த சம்பவம் நேற்றுமுன்தினம் வெள்ளிக்கிழமை (19) இடம்பெற்றுள்ளது.

கொட்டவெஹர பிரதேசத்தில் பொலிஸார் மற்றும் பொலிஸ் விசேட அதிரடிப்படையினரால் பொலிஸ் மோப்ப நாய்கள் மூலம் நீண்ட தூர  பயண வாகனங்களை சோதனை செய்யும் நடவடிக்கை மேற்கொள்ளப்பட்டுள்ளது.

இதன்போது பஸ் ஒன்றில் முன்னெடுக்கப்பட்ட சோதனையில் பஸ்ஸில் இருந்த பெண்ணொருவர் உள்ளாடையில் மறைத்து வைத்திருந்த வெடிபொருட்களுடன் கைது செய்யப்பட்டுள்ளார்.

சந்தேக நபரிடத்தில் இருந்து 2 டெட்டனேட்டர்கள் , 165 கிராம் கறுப்பு நிற வெடிமருந்து , 605 கிராம் அமோனியம் மற்றும் 10 அடி கம்பிச்சுருள் உள்ளிட்ட பொருட்கள் பொலிஸாரால் கைப்பற்றப்பட்டுள்ளன.

சந்தேக நபர் கற்குவாரியில் வேலை செய்துவருவதாகவும் தனது வீட்டின் பின் புறத்தில் உள்ள கற் பாறைகளை உடைப்பதற்காக இந்த வெடி பொருட்களை எடுத்துச் செல்வதாகவும் விசாரணையில் தெரியவந்துள்ளது.

கைதான பெண்ணின் வாக்கு மூலங்கள் ஒன்றுக்கொன்று முரண்படுவதால் தடுப்பு காவலில் வைக்கப்பட்டு விசாரிக்கப்பட்டு வருவதாக கொட்டவெஹர பொலிஸார் தெரிவித்துள்ளனர்.