யாழ்.மாநகரில் அடுத்தடுத்து 3 உணவகங்களுக்கு சீல்!! பொதுச் சுகாதார பரிசோதகர்கள் அதிரடி நடவடிக்கை..

யாழ்.மாநகரில் பொதுச் சுகாதார பரிசோதகர்கள் நடத்திய திடீர் சோதனை நடவடிக்கையில் சுகாதார சீர்கேட்டுடன் இயங்கிய மேலும் இரு உணவகங்கள் சீல் வைத்து மூடப்பட்டிருக்கின்றது. 

யாழ்.நகர பொதுச் சுகாதார பரிசோதகர் பா.சஞ்சீவன் தலைமையிலான பொதுச் சுகாதார பரிசோதகர் குழுவினால் யாழ்.நகர் பகுதியில் உணவகங்களில் பரிசோதனை மேற்கொள்ளப்பட்டது.

இதன்போது கஸ்தூரியார் வீதியில் அமைந்துள்ள உணவகங்கள் இரண்டு, பல்வேறு வகையான சுகாதார சீர்கேடுகளுடன் இயங்கியமை பொது சுகாதார பரிசோதகர்களினால் கண்டறியப்பட்டது. 

இதனையடுத்து நேற்றைய தினம் 12.05.2023 யாழ்.மேலதிக நீதவான் நீதிமன்றில் 02 உணவகங்களுக்கும் எதிராக "B" அறிக்கையில் வழக்குகள் தாக்கல் செய்யப்பட்டது. வழக்குகளை விசாரணை செய்த நீதவான் 

உணவகங்களை மறு அறிவித்தல் வரை சீல் வைத்து மூடுமாறு பொது சுகாதார பரிசோதகரிற்கு உத்தரவிட்டதுடன், உணவக உரிமையாளர்களை தலா ஒரு இலட்சம் சரீரப்பிணையில் விடுவித்தார்.

அத்துடன் வழக்கு விசாரணையினை எதிர்வரும் 28.06.2023 ற்கு ஒத்திவைத்தார்.இதனை தொடர்ந்து யாழ்.நகர் பொது சுகாதார பரிசோதகர் பா.சஞ்சீவனால் குறித்த இரண்டு உணவகங்களும் சீல் வைத்து மூடப்பட்டன.