பெண்ணை முழுதாக விழுங்கிய 16 அடி மலைப்பாம்பு!!

இந்தோனேஷியாவில் பெண்ணொருவரை 16 அடி நீளம் கொண்ட இராட்சத மலைப்பாம்பொன்று கொன்று முழுதாக விழுங்கியுள்ளதாக உள்ளூர் ஊடகங்கள் செய்தி வெளியிட்டுள்ளன. 

இவ்விடயம் தொடர்பில் மேலும் தெரியவருவதாவது:-

இறப்பர் பால் வெட்டும் தொழிலாளியான ஜஹ்ரா என்கிற பெண், கடந்த ஞாயிற்றுக்கிழமை இறப்பர் தோட்டத்தில் வேலைக்காக சென்றுகொண்டிருந்தபோதே இவ்வாறு பாம்பு விழுங்கி உயிரிழந்துள்ளார். 

இப்பெண் அன்றைய தினம் வீடு திரும்பாததால் அவரை காணவில்லை என பொலிஸாரிடம் முறைப்பாடு செய்யப்பட்டதையடுத்து, அவரை கண்டுபிடிப்பதற்கு பல குழுக்கள் அனுப்பப்பட்டுள்ளன.

இதேவேளை மறுநாள், வயிறு உப்பிய நிலையில் மலைப்பாம்பொன்றை கிராமவாசிகள் கண்டதை தொடர்ந்து சந்தேகம் எழுந்ததை அடுத்து, அந்த பாம்பை அவர்கள் கொன்று, அதன் உடலை வெட்டிப் பார்த்துள்ளனர்.

அப்போது காணாமல் போனதாக தேடப்பட்டு வந்த குறித்த பெண்ணின் உடல் அந்த பாம்புக்குள் இருந்துள்ளதாக பொலிஸ் அதிகாரி எஸ்.ஹரீபா தெரிவித்துள்ளார்.  இதன்போது பெண்ணை விழுங்கிய அந்த பாம்பு 5 மீற்றர் (16 அடி) நீளமானது என தெரிவிக்கப்பட்டுள்ளது.