உக்ரைனுக்கு அதிநவீன ஆளில்லா தாக்குதல் விமானங்கள்!! -விற்பனை செய்கிறது அமெரிக்கா-

ரஷ்யா படைகளுக்கு எதிரான யுத்தத்தில் உக்ரைனின் பயன்பாட்டிற்காக ஹெல்பயர் ஏவுகணைகள் உள்ளிட்ட ஆயுதங்களை சுமந்து சென்று தாக்குதல் நடத்தக்கூடிய நவீன ரக நான்கு ஆளில்லா விமானங்களை விற்பனை செய்ய அமெரிக்கா திட்டமிட்டுள்ளது. 

உக்ரைனுக்கு நீண்ட தூர அதிநவீன ஏவுகணை அமைப்புகளை அனுப்பவுள்ளதாக அமெரிக்க ஜனாதிபதி ஜோ பைடன் தெரிவித்த சில நாட்களில் அதிநவீன ஆளில்லா தாக்குதல் விமானங்களை விற்கும் அமெரிக்காவின் திட்டம் வெளியாகியுள்ளது.

இந்த வகை ஆளில்லா தாக்குதல் விமானங்களை அமெரிக்காவிடம் இருந்து உக்ரைன் பெற்றால் அது போரில் உக்ரைனுக்கு மிகப் பெரும் பலமாக இருக்கும் எனக் கருதப்படுகிறது.

இந்த வகை ஆளில்லா விமானங்கள் அதன் பணியைப் பொறுத்து 30 அல்லது அதற்கு மேற்பட்ட மணி நேரம் வரை பறக்கக்கூடியவை. அத்துடன், இவற்றைப் பயன்படுத்தி உளவுத்துறை நோக்கங்களுக்காக அதிக அளவு தரவுகளை சேகரிக்க முடியும். 

ஒரே நேரத்தில் 8 வரையான சக்திவாய்ந்த ஹெல்பயர் ஏவுகணைகளை எடுத்துச் சென்று தாக்குதல் நடத்தும் திறனையும் இந்த வகை ஆளில்லா விமானங்கள் கொண்டுள்ளமையும் குறிப்பிடத்தக்கது.