4300 ரஷிய படையினரை கொன்றுவிட்டோம்!! -அறிவித்தது உக்ரைன் இராணுவம்-
உக்ரைன் நாட்டிற்குள் ஊடுருவிய ரஷிய படையினர் 4300 பேரை கொன்றுவிட்டதாக தெரிவித்துள்ள அந்நாட்டு இராணுவம், சிலரை போர்க் கைதிகளாக பிடித்து வைத்திருப்பதாக கூறி தெரிவித்துள்ளது.
உக்ரைன் மீது ரஷிய படைகள் இன்று ஞாயிற்றுக்கிழமை 4 ஆவது நாளாக தாக்குதல் நடத்தி வருகின்றன. அதன்படி, இன்று ஞாயிற்றுக்கிழமை உக்ரைன் மீதான ரஷியாவின் அதிரடி தாக்குதல் தொடர்ந்து வருகிறது.
உக்ரைன் தலைநகர் கீவ்வை ரஷிய இராணுவ வீரர்கள் முழுமையாக கைப்பற்றும் நோக்கில் தாக்குதல் நடத்தி வருகின்றனர். நள்ளிரவில் தலைநகர் கீவின் பல இடங்களில் குண்டுகள் வெடித்தன. இதேபோல் மற்றொரு பெரிய நகரமான கார்கிவிலும் ரஷிய படைகள் நுழைந்து தாக்குதல் நடத்தி வருகின்றன.
இந்த போரில் இரு தரப்பிலும் பெருமளவில் உயிரிழப்பு மற்றும் பொருளாதார இழப்பு ஏற்பட்டுள்ளது. விரைவில் இரு நாடுகளும் பேச்சுவார்த்தைக்கு வந்தால் மட்டுமே இழப்புகளை தவிர்க்க முடியும்.
இந்நிலையில், போர் ஆரம்பித்ததில் இருந்து இதுவரை உக்ரைன் நடத்திய பதில் தாக்குதல்களில் 4300ற்க்கும் மேற்பட்ட ரஷிய வீரர்கள் கொல்லப்பட்டதாக உக்ரைன் இராணுவம் அறிவித்துள்ளது.
ரஷிய ராணுவத்தின் 146 பீரங்கிகள், 27 போர் விமானங்கள், 26 உலங்குவானூர்திகள் சுட்டு வீழ்த்தப்பட்டதாகவும் கூறி உள்ளது. இதுதவிர ரஷிய வீரர்கள் சிலரை போர்க் கைதிகளாக பிடித்து வைத்திருப்பதாகவும் உக்ரைன் இராணுவம் கூறி உள்ளது.
இதேபோல் ரஷிய பாதுகாப்புத்துறை கூறியிருக்கும் தகவலில், 223 பீரங்கிகள் மற்றும் ராணுவ வாகனங்கள், 28 போர் விமானங்கள், 39 ராக்கெட் லொஞ்சர்கள், 86 சிறிய ரக பீரங்கி மற்றும் மோர்ட்டார்கள், 143 சிறப்பு இராணுவ வாகனங்கள் அழிக்கப்பட்டதாக கூறி உள்ளது.
