பிரபல நடிகை சுட்டுக்கொலை!! -மெக்சிகோவில் சம்பவம்-
மெக்சிகோவில் உள்ள பிரபல நடிகையான டானியா மெண்டோசா மர்ம நபர்களால் சுட்டுக்கொல்லப்பட்ட சம்பவம் அங்கு பெரும் அதிர்ச்சியை ஏற்படுத்தியுள்ளது.
அந்நாட்டில் பெண்கள் மீதான வன்முறைச் சம்பவங்கள் நாளுக்கு நாள் அதிகரித்து வருகின்றன. அங்கு ஒரு நாளில் சராசரியாக 10 பெண்கள் கொலை செய்யப்படுவதாக புள்ளிவிவரங்கள் தெரிவிக்கின்றன.
இந்த நிலையில் அந்த நாட்டின் பிரபல நடிகையான டானியா மெண்டோசா மர்ம நபர்களால் சுட்டுக்கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது.
42 வயதான மெண்டோசா, 2005 இல் ‘லா மேரா ரெய்னா டெல் சுர்’ திரைப்படத்தில் முக்கிய கதாபாத்திரத்தில் நடித்ததன் மூலம் புகழ்பெற்றார். அது மட்டுமின்றி அண்மைய ஆண்டுகளில் இவர் பாடகியாகவும் வலம் வந்தார்.
இந்நிலையில் மெக்சிகோவின் மோரேலோஸ் குர்னவாகா நகரில் உள்ள கால்பந்தாட்ட பயிற்சி மையத்திலிருந்து, தனது மகனை வீட்டுக்கு அழைத்து செல்வதற்காக மெண்டோசா, பயிற்சி மையத்துக்கு வெளியே மகிழுந்தில் காத்துக் கொண்டிருந்துள்ளார்.
அதன்போது உந்துருளியில் வந்த இரு மர்ம நபர்கள், மெண்டோசாவை சரமாரியாக துப்பாக்கியால் சுட்டுவிட்டு தப்பி சென்றுள்ளனர். சம்பவ இடத்திலேயே மெண்டோசா பலியாகியுள்ளார்.
