தாய்வான் வான் பரப்புக்குள் நுழைந்த சீனாவின் 19 போர் விமானங்கள்!!
சீனாவின் 19 போர் விமானங்கள் மற்றும் அணு ஆயுத திறன் கொண்ட விமானங்கள் தமது வான்பரப்புக்குள் நுழைந்து வெளியேறியதாக தாய்வான் பாதுகாப்பு அமைச்சு தெரிவித்துள்ளது.
தாய்வானுக்கு அச்சுறுத்தல் வடும் வகையில் சீனாவின் விமானங்கள் தாய்வானுக்குள் அவ்வப்போது நுழைந்து வெளியேறி வருகின்றது. சீனாவின் இந்த நடவடிக்கைக்கு தாய்வான் கடும் எதிர்ப்புத் தெரிவித்து வருகின்றபோதும் சீனா அதனைப் பொருட்படுத்திக் கொள்வதில்லை.
இந்நிலையில் மீண்டும் ஒரு சீண்டல் நடவடிக்கையாக சீன விமானப் படையின் 19 போர் விமானங்கள் தமது வான் பரப்பில் பறந்ததாக தாய்வான் கூறியுள்ளது.
அந்த விமானங்கள் அணு ஆயுதங்கள் மற்றும் நீர்மூழ்கிக் கப்பல் எதிர்ப்பு ஏவுகணைகளை தாங்கிச் செல்லும் திறன் வாய்ந்தவை என்றும் தைவான் தெரிவித்துள்ளது. எனினும் இந்த நடவடிக்கை குறித்து சீனா இதுவரை எந்தக் கருத்துக்களையும் தெரிவிக்கவில்லை என்பது குறிப்பிடத்தக்கது.
