கட்டுமான தளத்தில் ராட்சத கிரேன் முறிந்து விழுந்து கோர விபத்து!! -பிரிட்டிஷ் கொலம்பியாவில் நால்வர் பலி-

கனடாவின் கொலம்பியா மாகாணம் - கெலவ்னா நகரில் மிகப் பெரும் கட்டுமான பணியில் ஈடுபட்டிருந்த கிரேன் திடீரென சரிந்து விழுந்த விபத்தில் சிக்கி 4 பேர் உயிரிழந்துள்ளதுடன் ஒருவர் காணாமல் போயுள்ளார். 

காணாமல் போனவர் உயிரிழந்திருக்கலாம் என நம்பப்படுகிறது என கெலவ்னா நகர பொலிஸ் தலைமைக் கண்காணிப்பாளர் ஆடம் மக்கிண்டோஸ் தெரிவித்துள்ளார்.

கொலம்பியா மாகாணத்தில் உள்ள கெலவ்னா நகரில் 25 மாடி கட்டிடத்தின் கட்டுமான பணிகளுக்காக நிறுத்திவைக்கப்பட்டிருந்த ராட்சத கிரேன் சரிந்து விழுந்ததில் இந்த அனர்த்தம் நிகழ்ந்தது.

இதில் சிக்கிய 3 பேர் சம்பவ இடத்திலேயே உயிரிழந்தனர். ஒருவர் படுகாயங்களுடன் வைத்தியசாலையில் அனுமதிக்கப்பட்டு பின்னர் உயிரிழந்தார். ஐந்தாவது நபரின் உடல் இடிபாடுகளில் சிக்குண்டுள்ளதாக நம்பப்படுகிறது.

மீட்புப் பணியாளர்களின் உதவியுடன் அவரது உடலை பாதுகாப்பான வழியில் மீட்கும் நடவடிக்கைகள் இடம்பெற்று வருகின்றன.

விபத்தில் இறந்த 4 பேர் மற்றும் இடிபாடுகளில் சிக்கியுள்ளவர் அனைவரும் ஆண்கள் எனத் தெரிவித்துள்ள கெலவ்னா நகர பொலிஸ் தலைமைக் கண்காணிப்பாளர் ஆடம் மக்கிண்டோஸ் அவர்களின் அடையாளங்களை பொது வெளியில் வெளியிடவில்லை.

சம்பவம் குறித்து பாதிக்கப்பட்டவர்களின் குடும்பத்தினருக்கு அறிவிக்கப்பட்டுள்ளதாக அவர் கூறினார்.

உயிரிழந்த 4 பேரில் 3 பேர் வேலைத்தளத்தில் பணிபுரிந்தவர்களாவர். 4 ஆவது நபர் அந்தப் பணியுடன் தொடர்புபடாதவர் எனவும் ஆடம் மக்கிண்டோஸ் தெரிவித்தார்.

இதேவேளை, இந்தச் சம்பவத்தை அடுத்து கெலவ்னா நகரில் நேற்று முன்தினம் திங்களன்று அவசரநிலை அறிவிக்கப்பட்டது. மறுநாள் நேற்று செவ்வாய்க்கிழமையும் அவசர நிலை நீடிக்கப்பட்டது.