சுதந்திர தின கொண்டாட்டத்தில் துப்பாக்கி சூடு!! -அமெரிக்காவில் இருவர் பலி-

அமெரிக்காவில் நடந்த சுதந்திர தின கொண்டாட்டத்தில் திடீரென நடத்தப்பட்ட துப்பாக்கி சூட்டுச் சம்பவத்தில் இளவயதான 2 பேர் கொல்லப்பட்டுள்ளதாக அங்கிருந்து வரும் தகவல்கள் தெரிவிக்கின்றன. 

அந்நாட்டில் நடந்த சுதந்திர தின கொண்டாட்டத்தின் ஒரு பகுதியாக ஓஹியோ மாகாணத்தின் சின்சின்னாட்டி நகரில் உள்ள பூங்கா ஒன்றில் இளவயதினர் 400 பேர் திரண்டு கொண்டாட்டங்களில் ஈடுபட்டு உள்ளனர்.

இதன்போது அங்கு வந்த மர்ம நபர் துப்பாக்கி சூட்டில் ஈடுபட்டுள்ளார். இதில் 16 மற்றும் 19 வயதுடைய 2 பேர் கொல்லப்பட்டனர். அவர்கள் அடையாளம் காணப்பட்டு உள்ளனர். இந்த சம்பவத்தில் 3 பேர் காயமடைந்தனர்.

இது திட்டமிடப்பட்ட தாக்குதலா என்பது பற்றி தெரியவரவில்லை என பொலிஸார் தெரிவித்துள்ளனர். அந்நாட்டில் இவ்வருடத்தின் முதல் 5 மாதங்களில் 8,100 பேர் துப்பாக்கி சூடு சம்பவங்களில் கொல்லப்பட்டு உள்ளமை குறிப்பிடத்தக்கது.