கீழே விழுந்து நொருங்கிய விமானம்!! -45 பேர் பலி: 50 பேர் படுகாயம்-

பிலிப்பைன்ஸ் நாட்டில் இராணுவ விமானம் திடிரேன கீழே விழுந்து விபத்துக்குள்ளானதில் உயிரிழந்தவர்களின் எண்ணிக்கை 45 ஆக உயர்ந்துள்ளது.

படுகாயங்களுடன் 50 பேர் வைத்தியசாலைகளில் சிகிச்சை பெறும் நிலையில் மேலும் 17 பேரை காணவில்லை என கூறப்படுகிறது. புதிதாக இராணுவத்திற்கு தேர்வு செய்யப்பட்ட சுமார் 100 வீரர்களுடன் வந்த இந்த சி-130 ரக விமானம், மணிலாவுக்கு தெற்கே 1000 கிலோ மீட்டர் தொலைவில் உள்ள சூலு மாகாணத்தின் ஜோலோ தீவில் தரையிறங்க முயன்றது.

அப்போது ஓடுதளத்தில் இருந்து தவறி பாய்ந்த விமானத்தை மேலே உயர்த்த விமானி முயன்றார். ஆனால் விமானம் கீழே விழுந்து நொறுங்கி தீப்பிடித்தது. இதன் போது விமானத்தில் இருந்த சில வீரர்கள் விமானத்தின் ஜன்னல்கள் வழியாக தப்பி குதித்து உயிரை காப்பாற்றிக் கொண்டதாக அந்நாட்டு இராணுவம் தெரிவித்துள்ளது.