முன்னாள் போராளிகளுக்கு தகுதி இருந்தால் இ.போ.சவில் வேலைவாய்ப்பு - அரசு உறுதியளிப்பு

மறுவாழ்வு வழங்கப்பட்ட முன்னாள் போராளிகளுக்கு தகுதி இருந்தால் இலங்கை போக்குவரத்து சபையின் மூலமாக வடக்கு – கிழக்கில் வேலைவாய்ப்புகளை வழங்க நடவடிக்கை எடுப்பதாக போக்குவரத்து மற்றும் சிவில் விமானசேவைகள் பிரதி அமைச்சர் அசோக அபேசிங்க நாடாளுமன்றில் தெரிவித்தார்.

நாடாளுமன்றத்தில் இன்று வியாழக்கிழமை, மோட்டார் வாகன சட்டத்தின் கீழான ஒழுங்கு விதிகளின் விவாதத்தின் போது உரையாற்றுகையில் தமிழ் தேசியக் கூட்டமைப்பின் நாடாளுமன்ற உறுப்பினர் சார்ல்ஸ் நிர்மலநாதன் முன்வைத்த கோரிக்கைக்கு பதிலளிக்கும் போதே அவர் இதனைத் தெரிவித்தார்.

“கிழக்கு மாகாணத்தில் சாரதி, நடத்துனர் போன்ற நியமனங்கள் வழங்கப்பட்டுள்ளன. எனினும் வடபிராந்திய போக்குவரத்துச் சபையில் அதிக வெற்றிடங்கள் இல்லை. சாரதிக்குரிய வெற்றிடம் 40 , நடத்துனர்  வெற்றிடம் 40, பேருந்து திருத்துனருக்கு 38 வெற்றிடங்களும் உள்ளன.

இந்த வெற்றிடங்களுக்கு மறுவாழ்வு வழங்கப்பட்டுள்ள முன்னாள் போராளிகளுக்கு வேலைவாய்ப்பை வழங்க வேண்டும். போர் நிறைவடைந்த பின்னர் விடுவிக்கப்பட்ட எமது மக்கள் உள்ளனர்.

அவர்களில் திறமையான சாரதிகள் உள்ளனர். அவர்களை கருத்தில் கொண்டு ஜனநாயக ரீதியில் இணைந்து வாழ விரும்பும் எமது இளைஞர்களுக்கு வாய்ப்புக்களை வழங்க வேண்டும். வடக்கு மாகாணத்தில் மட்டும் அல்ல 12 போக்குவரத்து பிராந்தியங்களில் 2011ஆம் ஆண்டு நவம்பர் முதல் 2015 ஓகஸ்ட் மாதம் வரையில் ஊழியர் சேமலாப நிதியம் செலுத்தப்படவில்லை.

குறிப்பிட்ட காலப்பகுதியில் போக்குவரத்து அமைச்சால் செலுத்த வேண்டிய உரிய நிதியம் செலுத்தப்படவில்லை அவற்றை வழங்க நடவடிக்கை எடுக்க  வேண்டும் ,வேலைவாய்ப்பு வழங்க வேண்டும்” என நாடாளுமன்ற உறுப்பினர் சார்ல்ஸ் நிர்மலநாதன் கோரிக்கை விடுத்தார்.

பதிலளித்து உரையாற்றிய போக்குவரத்து மற்றும் சிவில் விமானசேவைகள் பிரதி அமைச்சர் அசோக அபேசிங்க தெரிவித்ததாவது:

கடந்த காலத்தில் இந்த நிதியம் ஒதுக்கப்பட்டிருக்கவில்லை. எனினும் நாம் இப்போது 10.5 பில்லியன் நிதி ஒதுக்கப்பட்டுள்ளது. எமது ஆட்சியில் இதனை ஒதுக்கியுள்ளோம். இந்த ஆண்டு இறுதிக்குள் அனைத்து நபர்களுக்கும் நிதி கிடைக்கும். நிலுவையில் உள்ள அனைத்து நிதியும் மே மாதத்துக்கு முன்னர் கிடைக்கும். உரிய பிரதேசங்களில் உள்ள வெற்றிடங்களுக்கு உரிய பகுதி மக்களையே நியமிக்க முடியும்.

வடக்கு கிழக்கை பொறுத்த வரையில் அரசு இலாபம் அடையும் பகுதியாக உள்ளது. குறிப்பாக இலங்கைப் போக்குவரத்துச் சபையின் வடக்கு மற்றும் கிழக்கிலுள்ள சாலைகளில் 120 மில்லியன் ரூபா நிதி நிரந்தர வைப்புகளில் உள்ளன.

ஆகவே இவற்றைக் கருத்தில் கொண்டு நாம் எதிர்காலத்தில் வெற்றிடங்களை நிரப்பும் நடவடிக்கைகளை எடுப்போம். எனினும் திருத்துனர்களை நாம் இணைத்துக்கொள்வதில்லை. மாறாக சாரதிகள், நடத்துனர்கள் வெற்றிடங்களுக்கு நபர்களை இணைத்துக்கொள்ள முடியும்.

முன்னாள் போராளிகளில் தகுதியானவர்கள் இருப்பார்கள் என்றால் உரிய காரியாலங்களுக்கு விண்ணப்பிக்க வலியுறுத்துங்கள். இலங்கை போக்குவரத்து சபை தலைமை காரியாலயத்திற்கு விண்ணபிக்க கூறுங்கள்.

தகமைக்கு அமைய நாம் அவர்களை இணைத்துக்கொள்கின்றோம். வாகன சாரதிகளாக 8 ஆம் தரம் சித்தி பெற்றிருந்தால் போதுமானது. 45 வயதுக்கு குறைவானவர்கள், 5 ஆண்டுகள் கனரக வாகனம் சாரதி அனுமதிப்பத்திரம் இருக்க வேண்டும். நடத்துனருக்கு கணக்கு பாடத்தில் சாதாரண சித்தியுடன் 6 பாடங்களில் சித்தி பெற்றிருந்தால் போதுமானது. அவ்வாறான நபர்கள் இருப்பின் எம்மிடம் அறிவியுங்கள். நாங்கள் உரிய நபர்களுக்கு வேலை வாய்ப்புகளை பெற்றுத்தருகின்றோம்.

ஒரு நாளைக்கு ஆயிரம் ரூபா சம்பளம் வழங்கப்படும். இதர சலுகைகளும் உள்ளன – என்றார்.