இங்கிலாந்து படைத் தளபதிக்கு கொரோனா!! -நாட்டின் பாதுகாப்பு அதிகாரிகள் பலர் தனிமைப்படுத்தலில்-

இங்கிலாந்து நாட்டின் ஆயுதப் படைகளில் தலைமைத் தளபதி ஜெனரல் சர் நிக் கார்ட்டர் கொரோனா தொற்றுக்குள்ளாகிப் பாதிக்கப்பட்டுள்ளார். இதனையடுத்து அவருடன் நெருக்கமான பாதுகாப்பு செயலாளர் மற்றும் மிக மூத்த இராணுவ தளபதிகள் 6 பேர் சுயதனிமைப்படுத்தப்பட்டுள்ளனர்.

வழக்கமான கொரோனா பரிசோதனையின்போது அவருக்கு கொரோனா வைரஸ் தொற்று உறுதி செய்யப்பட்டதாக இங்கிலாந்து பாதுகாப்பு அமைச்சு விடுத்துள்ள செய்திக்குறிப்பில் தெரிவிக்கப்பட்டுள்ளது.

கொரோனா தொற்று உறுதி செய்யப்படுவதற்கு சில தினங்களுக்கு முன்பு ஆயுதப் படைகளின் தலைமைத் தளபதி ஜெனரல் நிக் கார்ட்டர் மூத்த இராணுவ அதிகாரிகளுடன் ஆலோசனை கூட்டம் ஒன்றை நடத்தியிருந்தமை குறிப்பிடத்தக்கது.