சுற்றுலா சென்ற பாடசாலை பேருந்து பள்ளத்தில் பாய்ந்து விபத்து!! -27 பேர் பலி: 39 பேர் படுகாயம்-
இந்தோனேசியா நாட்டில் ஜாவா பகுதியில் சுற்றுலாப் பயணிகள் சென்ற பேருந்து ஒன்று திடீரென பள்ளத்தில் கவிழ்ந்து விபத்துக்குள்ளானதில் அதில் பயணம் செய்த 27 பேர் பரிதாபமாக உயிரிழந்துள்ளனர்.
மேலும் அந்த பேருந்தில் பயணித்த 39 பேர் படுகாயமடைந்த நிலையில் சிகிச்சைக்காக வைத்தியசாலையில் அனுமதிக்கப்பட்டுள்ளனர். அவர்களில் 13 பேரின் நிலைமை கவலைக்கிடமாக உள்ளதாக வைத்தியசாலை தகவல்கள் தெரிவிக்கின்றன.
நாட்டின் மேற்கு ஜாவா மாகாணத்தின் சுபங் நகரத்தைச் சேர்ந்த உயர்தர பிரிவு மாணவர்கள், ஆசிரியர்கள் மற்றும் பெற்றோர்கள் தாசிக்மாலயா மாவட்டத்தில் உள்ள புனித தலத்துக்கு சுற்றுலா சென்றுள்ளனர்.
சுற்றுலாவை முடித்து கொண்டு அவர்கள் திரும்பிய வேளை பேருந்து கட்டுப்பாட்டை இழந்து 20 மீட்டர் ஆழம் கொண்ட பள்ளத்துக்குள் பாய்ந்துள்ளது.
பேருந்தின் பிரேக் செயலிழந்ததையடுத்து இந்த விபத்து ஏற்பட்டதாக முதல் கட்ட விசாரணையில் தெரியவந்துள்ளதாக இந்தோனேசிய போக்குவரத்துத் துறை அமைச்சு தகவல் தெரிவித்துள்ளது.
