யாழ்ப்பாணம் - கொழும்பு இ.போ.ச பேருந்து மயிரிழையில் விபத்திலிருந்து தப்பியது..! திடீரென வீதியின் குறுக்கே விழுந்த மரம்..

யாழ்ப்பாணத்திலிருந்து கொழும்பு சென்ற இ.போ.ச பேருந்து பாரிய விபத்திலிருந்து மயிரிழையில் தப்பியுள்ளது.

குறித்த சம்பவம் நேற்று இரவு வவுனியா - பேயாடி கூழாங்குளம் பகுதியில் இடம்பெற்றிருக்கின்றது. 

குறித்த பகுதியில் நின்றிருந்த பழைமையான புளிய மரம் நேற்றிரவு 8 மணியளவில் வேரோடு சாய்ந்து மின்கம்பத்தையும் சேதப்படுத்திக் கொண்டு 

ஏ – 9 பிரதான வீதியின் குறுக்காக விழுந்தது. அவ்வேளையில் அவ்வீதியால் யாழ்ப்பாணத்திலிருந்து கொழும்பு நோக்கி இ.போ.ச. பஸ் ஒன்றும் பயணித்திருந்தது. 

எனினும், மரம் முறிந்து விழுவதை அவதானித்த பஸ்ஸின் சாரதி விரைந்து செயற்பட்டு பஸ்ஸை வீதியின் கரையால் செலுத்தியமையால் 

பாரிய அசம்பாவிதம் தவிர்க்கப்பட்டது.குறித்த விபத்தால் ஏ – 9 வீதியுடனான போக்குவரத்து நேற்றிரவு ஒரு மணி நேரம் தாமதமடைந்திருந்தது.

இதனையறிந்து சம்பவ இடத்துக்குச் சென்ற பொலிஸார் மற்றும் இராணுவத்தினர் மரத்தை வெட்டி அகற்றும் பணியில் ஈடுபட்டனர்.

வவுனியாவில் கடந்த சில நாள்களாக மழையுடனான காலநிலை நீடித்து வருகின்றமை குறிப்பிடத்தக்கது.