சமூக வலைத்தளம் மூலம் நட்பான இளம்பெண்ணை கண்டந்துண்டமாக வெட்டி கொலை செய்த இளைஞர்!

சமூக வலைத்தளம் மூலம் நட்பான இளம்பெண்ணை கண்டந்துண்டமாக வெட்டி கொலை செய்த அமெரிக்க இளைஞரை ஜப்பான் போலீசார் கைது செய்து விசாரணை நடத்தி வருகின்றனர். ஜப்பானின் அஹாசா நகரில் கடந்த ஒருவாரமாக இளம்பெண் ஒருவரின் பல்வேறு பாகங்கள் வெவ்வேறு இடங்களில் கிடைத்தவண்ணம் இருந்தன. 

நேற்று முன்தினம் வெளிநாட்டினர் தங்கும் தனியார் சொகுசு விடுதி அருகே பெரிய சூட் கேஸில் கொடூரமாக சிதைந்த நிலையில் இளம்பெண்ணின் தலை கண்டெடுக்கப்பட்டது. இதனால் அதிர்ச்சியடைந்த போலீசார், சொகுசு விடுதியில் பதிவான சிசிடிவி காட்சிகளை வைத்து விசாரணையை துரிதப்படுத்தினர்.

அப்போது அமெரிக்க சுற்றுலாப்பயணி ஒருவர் அடிக்கடி பெரிய பேக்கை எடுத்துக்கொண்டு வெளியேசெல்வது தெரியவந்தது. உடனடியாக அவரை விசாரணை வளையத்துக்குள் ஜப்பான் போலீசார் கொண்டுவந்தனர். அமெரிக்காவை சேர்ந்த 26 வயதான பே ராக்டருக்கு சமூக வலைத்தளம் மூலம் ஜப்பானை சேர்ந்த ஜாய்க்கோ-வுடன் நட்பு ஏற்பட்டுள்ளது. 

அமெரிக்காவில் இருந்து ஜாய்க்கோவை சந்திப்பதற்காக பே ராக்டர் கடந்த 16-ம் தேதி ஜப்பான் வந்துள்ளார். சொகுசு விடுதியில் இருவரும் நேரில் சந்தித்துள்ளனர். அப்போது திடீர் கருத்துமோதல் ஏற்பட்டதால் ஜாய்க்கோவை பே ராக்டர் வெட்டி கொலை செய்துள்ளது விசாரணையில் தெரியவந்துள்ளது.