சிறிலங்கன் எயர்லைன்சின் சிறப்பு விமானம் 3 நாடுகளில் இருந்து 417 பேர் நாடு திரும்பினர்!

பிரித்தானியா, மாலைதீவு, சிங்கப்பூர் ஆகிய நாடுகளில் சிக்கியிருந்த 417 இலங்கையர்கள் இன்று இலங்கைக்கு திருப்பி அழைத்து வரப்பட்டுள்ளனர்.

பிரித்தானியாவில் சிக்கியிருந்த 154 இலங்கையர்கள் இன்று சிறப்பு விமானம் மூலம் இலங்கையை வந்தடைந்துள்ளனர். 

லண்டனின், ஹீத்ரோ விமான நிலையத்தில் இருந்து, 154 இலங்கையர்களை ஏற்றிக் கொண்டு, சிறிலங்கன் எயர்லைன்சின் சிறப்பு விமானம், இன்று பிற்பகல் 1.10 மணியளவில் கட்டுநாயக்க விமான நிலையத்தை வந்தடைந்துள்ளது.

விமானத்தில் அழைத்து வரப்பட்ட அனைவருக்கும், கட்டுநாயக்க விமான நிலையத்திலேயே பிசிஆர் பரிசோதனைகள் மேற்கொள்ளப்பட்ட பின்னர், தனிமைப்படுத்தல் நிலையங்களுக்கு அனுப்பி வைக்கப்பட்டுள்ளனர்.

அதேவேளை, மாலைதீவில் இருந்தும் 169 இலங்கையர்கள், இன்று மாலை நாடு திரும்பியுள்ளனர் என தகவல்கள் கூறுகின்றன. இவர்கள், மாலேயில் இருந்து சிறிலங்கன் எயர்லைன்சின் சிறப்பு விமானம் மூலம், மத்தல விமான நிலையத்தை வந்தடைந்துள்ளனர்.

நாடு திரும்பிய அனைவருக்கும் பி.சீ.ஆர் பரிசோதனை மேற்கொள்ளப்பட்டுள்ளதாகவும் தெரிவிக்கப்படுகிறது.

மேலும், சிங்கப்பூரில் சிக்கியிருந்த 94 பேர், இன்று மாலை, சிறிலங்கன் எயர்லைன்ஸ் நிறுவனத்தின் சிறப்பு விமானம் மூலம், நாடு திரும்பியுள்ளனர்.