லண்டன், சிங்கப்பூரில் இருந்து 380 மாணவர்கள் கொழும்பு திரும்பினர்!

பிரித்தானியாவிலும், சிங்கப்பூரிலும் சிக்கியிருந்த மற்றொரு தொகுதி மாணவர்கள், சிறிலங்கன் எயர்லைன்ஸ் விமானம் மூலம் இன்று கொழும்புக்கு அழைத்து வரப்பட்டுள்ளனர்.

லண்டனில் இருந்து, இன்று அதிகாலை கட்டுநாயக்க விமான நிலையத்தை வந்தடைந்த சிறப்பு விமானத்தில், 194 மாணவர்கள் அழைத்து வரப்பட்டதாக விமான நிலையத் தகவல்கள் கூறுகின்றன.

இந்த மாணவர்களுக்கு விமான நிலையத்தில் முதற்கட்ட சோதனைகள் நடத்தப்பட்ட பின்னர், இராணுவத்தினரின் பேருந்துகள் மூலம், தனிமைப்படுத்தல் நிலையங்களுக்கு அழைத்துச் செல்லப்பட்டனர்.

இதனிடையே, சிங்கப்பூரில் சிக்கியிருந்த மற்றொரு தொகுதி மாணவர்களை ஏற்றிக் கொண்டு சிறிலங்கன் எயர்லைன்ஸ் விமானம் ஒன்று இன்று மாலை கட்டுநாயக்க விமான நிலையத்தை வந்தடைந்திருப்பதாக தகவல்கள் கூறுகின்றன. இந்த விமானத்தில் 186 மாணவர்கள் அழைத்து வரப்பட்டுள்ளனர்.

இந்த மாணவர்களை அழைத்து வருவதற்காக, கொழும்பில் இருந்து புறப்பட்டுச் சென்ற சிறிலங்கன் எயர்லைன்ஸ் விமானத்தில் 10 சிங்கப்பூர் பிரஜைகள் அனுப்பி வைக்கப்பட்டனர் .