3 ஆயிரத்தை தாண்டிய கொரோனா உயிரிழப்பு!!

உலக நாடுகளை அச்சுறுத்திவரும் உயிர்கொல்லி கொரோனா வைரஸ் பாதிப்பினால் சீனாவில் இதுவரை 2,912 பேர் உயிரிழந்த நிலையில், உலக அளவில் பலி எண்ணிக்கை 3000ஐ தாண்டி உள்ளது.

சீனாவில் ஹுபெய் மாகாணம் வுகான் நகரில் இருந்து கடந்த டிசம்பர் மாதம் பரவத் தொடங்கிய ஆட்கொல்லி கொரோனா வைரஸ், சீனா மட்டுமின்றி உலக நாடுகளை அச்சுறுத்தி வருகிறது. 

சீனாவில் மிகப்பெரிய மனித பேரழிவை ஏற்படுத்தி உள்ள இந்த நோய், சீனாவுக்கு வெளியே சுமார் 60 நாடுகளில் பரவி உள்ளது. சீனாவில் கடந்த சில தினங்களாக கொரோனா வைரஸ் தாக்கம் குறையத் தொடங்கி உள்ளது.

இந்நிலையில் சீனாவில் நேற்று மேலும் 42 பேர் கொரோனா வைரசுக்கு பலியாகி உள்ளனர். இதன்மூலம் சீனாவில் கொரோனா வைரஸ் பாதிப்புக்கு பலியானோரின் எண்ணிக்கை 2,912 ஆக உயர்ந்திருப்பதாக தேசிய சுகாதார ஆணையம் கூறி உள்ளது. உலக அளவில் இந்த வைரசுக்கு பலியானோர் எண்ணிக்கை 3000ஐ தாண்டி உள்ளது. சீனாவில் 80 ஆயிரத்துக்கும் மேற்பட்டோர் இந்த வைரசால் பாதிக்கப்பட்டு மருத்துவமனையில் உள்ளனர். 

சீனாவுக்கு அடுத்து, தென்கொரியாவில் அதிக அளவில் கொரோனா பாதிப்பு உள்ளது. 26 பேர் பலியாகி உள்ளனர். 4,212 பேர் மருத்துவமனையில் சேர்க்கப்பட்டுள்ளனர். ஈரானில் 978 பேர் பாதிக்கப்பட்டுள்ளனர். 54 பேர் உயிரிழந்துள்ளனர்.