எலும்பும் தோலுமாக பூங்காவில் அவதியுறும் சிங்கங்கள்!! -மனதை உருக்கும் புகைப்படங்கள் வெளியானதால் அதிர்ச்சி-

சூடானில் உள்ள கார்டோம் அல் குரேஷி (Khartoum’s Al-Qureshi) விலங்கியல் பூங்காவில் உள்ள பெண் சிங்கங்களின் எலும்பும் தோலுமாக காட்சியளிக்கும் புகைப்படங்கள் தற்போது சமூகவலைத்தளங்களில் வைரலாக பரவி வருகின்றது. 

இதுவரை மிகப்பெரிய உருவத்துடன் கம்பீரமாகவே நம்மால் பார்க்கப்பட்ட சிங்கங்கள், உடல் மெலிந்து, எலும்பும் தோலுமாக காட்சி அளிக்கிறது.

சிங்கம் என்றவுடன், அதன் கம்பீரமான தோற்றமும், மிடுக்கான நடையுமே அனைவர் மனதிலும் தோன்றும். ஆனால், இந்த பெண் சிங்கங்களின் புகைப்படங்கள் சில சமூகவலைதளவாசிகளின் மனதில் பெரிய தாக்கத்தை ஏற்படுத்திவருகிறது.

சூடானில் நிலவி வரும் கடும் பொருளாதார நெருக்கடி மற்றும் அத்தியாவசிய பொருட்களின் விலை உயர்வே இந்த சிங்கங்கள் இவ்வாறு இருப்பதற்கான காரணம் என கூறப்படுகிறது.

சூடான் அரசு சார்பாக நடத்தப்பட்டு வரும் இந்த விலங்கியல் பூங்காவில் இருக்கும் சிங்கங்களுக்கு கடந்த சில வாரங்களாகவே உணவு வழங்கப்படவில்லை எனவும் சரியான மருத்துவ வசதியும் கிடைக்கவில்லை எனவும் பூங்கா அதிகாரிகள் தெரிவிக்கின்றனர். மேலும், மிகக் கொடிய நோயால் அந்த சிங்கங்கள் பாதிக்கப்பட்டிருப்பதாகவும் தெரிவிக்கின்றனர்.

சிங்கங்களின் புகைப்படங்களை ஃபேஸ்புக்கில் பதிவிட்டிருந்த ஓஸ்மான் சலி என்பவர், பாதிக்கபட்டுள்ள சிங்கங்களுக்கு உதவ முன்வாருங்கள் என கோரிக்கை விடுத்தார். அதனை அடுத்து, ஆயிரக்கணக்கான தன்னார்வலர்கள் மற்றும் கால்நடை மருத்துவர்கள் சிங்கங்களுக்கு உணவு கொடுத்தும் உரிய சிகிச்சை அளித்தும் உதவி வருகின்றனர். எனினும் 5 சிங்கங்களில், ஒரு சிங்கம் இறந்துவிட்டது என பூங்கா அதிகாரிகள் தெரிவித்தனர். 

எலும்பும் தோலுமாகவும், முகத்தில் பல ஈக்கள் மற்றும் பூச்சிகளுடன் காணப்படும் சிங்கங்களின் புகைப்படங்கள், காண்போரையும் கண்ணீர் வரவழைக்கச்செய்கிறது. சிங்கங்கள் உடனடியாக நலம் பெற வேண்டும் என்பதே அனைவரின் பிரார்த்தனையாகவும் இருக்கிறது.