ஆப்பிரிக்காவின் போட்ஸ்வானா நாட்டில் விலை உயர்ந்த வைரம் கண்டுபிடிப்பு!

விலை உயர்ந்த வைரம் ஒன்று ஆப்பிரிக்காவின் போட்ஸ்வானா நாட்டில் கண்டுபிடிக்கப்பட்டிருக்கிறது. அந்நாட்டு அரசுக்குச் சொந்தமான ஒகவாங்கோ வைர நிறுவனத்தால், 20.46 கேரட் மதிப்புள்ள அப்பெரிய நீல நிற வைரம் கண்டுபிடிக்கப்பட்டுள்ளது. 

இதுவரையில் ஆப்பிரிக்காவில் கண்டுபிடிக்கப்பட்ட நீல நிற வைரங்களிலேயே இதுதான் மிகவும் விலை மதிப்பு உடையதாக இருக்கும் என குறிப்பிட்ட நிறுவனம் தெரிவித்துள்ளது. பிரகாசமான நீல வண்ணம் கொண்ட இந்த வைரக்கல், சுமார் ஒரு கோடி முதல் 3 கோடி ஆண்டுகளுக்கு முன்பாக உருவாகி இருக்கலாம் எனக் கருதப்படுகிறது.

கடற்பாறைகள் மத்தியில் இது காணப்பட்டதாகவும் கூறப்படுகிறது. கடந்த பத்தாண்டுகளில் இதுபோன்ற நீல நிற வைரக் கற்கள் மிகச் சில மட்டுமே சந்தைக்கு வந்துள்ளதாக ஒகவாங்கோ நிறுவனத்தின் நிர்வாக இயக்குனர் மார்க்கஸ் டெர்ஹர் தெரிவித்துள்ளார். இவ்வாண்டு இறுதிக்குள் இந்த வைரம் விற்பனை செய்யப்படும் என்றும் மேற்கண்ட நிறுவனம் அறிவித்திருக்கிறது.