வறிய நிலையில் வீடற்ற வாடிக்கையாளர்களைப் புறக்கணிக்கும் பிரித்தானித வங்கிகள்!

பிரிட்டனின் முன்னணி வங்கிகள், வறிய நிலையில் உள்ள மற்றும் வீடற்ற வாடிக்கையாளர்களுக்கு உரிய சேவைகளை வழங்கத் தவறிவிட்டதாக அந்நாட்டின் நிதி நடத்தை ஆணையம் (FCA) குற்றம் சாட்டியுள்ளது.

வீடற்றவர்கள் மற்றும் நிதி நெருக்கடியில் இருப்பவர்களுக்கு 'பேசிக் பேங்க் அக்கவுண்ட்' (Basic Bank Account) எனப்படும் கட்டணமில்லாத கணக்குகளைத் தொடங்குவதற்குப் பதிலாக, அவர்களுக்குப் பொருந்தாத ஆன்லைன் விண்ணப்பங்களை வங்கிகள் பரிந்துரைப்பதாகக் கூறப்படுகிறது.

இந்த வங்கிக் கணக்குகள் மோசமான கடன் வரலாறு (bad credit history) கொண்டவர்கள், திவாலானவர்கள் அல்லது முறையான இருப்பிடச் சான்று இல்லாதவர்களுக்கு மிகவும் அவசியமானவை.

FCA நடத்திய சோதனையில், அடிப்படை வங்கிக் கணக்கு தொடர்பான மூன்றில் ஒரு பங்கு அனுபவங்கள் 'மிகவும் மோசமாக' இருப்பதாகக் கண்டறியப்பட்டுள்ளது.

பார்க்லேஸ் (Barclays), எச்எஸ்பிசி (HSBC), சாண்டாண்டர் (Santander) உள்ளிட்ட 9 முக்கிய வங்கிகள், இனி வரும் காலங்களில் முறையான அடையாளச் சான்று அல்லது நிரந்தர முகவரி இல்லாதவர்களுக்கும் வங்கிச் சேவைகளை எளிதாக்க ஒப்புக்கொண்டுள்ளன.

நிதி உள்ளடக்கம் (Financial Inclusion) என்பது அனைவருக்கும் சமமாக கிடைக்க வேண்டும் என்பதே பிரிட்டன் சமூக ஆர்வலர்களின் கோரிக்கையாக உள்ளது.