500 ரூபாய் தொடக்கம் 750 ரூபாய்வரை உயர்த்தப்படவுள்ள சமையல் எரிவாயு விலை!

லிட்ரோ சமையல் எரிவாயுவின் விலை 12.5 கிலோ சிலின்டர் ஒன்றுக்கு 500 ரூபாய் தொடக்கம் 750 ரூபாய் வரை உயர்த்தப்படவுள்ளதாக லிட்ரோ நிறுவனத்தின் அதிகாரி ஒருவர் தொிவித்தருக்கின்றார். 

அவ்வாறே 5 கிலோ நிறையுடைய சிலிண்டர் மற்றும் 2.3 கிலோ நிறையுடைய சிலிண்டர் ஆகியவற்றின் விலைகளும் அதிகரிக்கப்படும் எனவும் அவர் மேலும் தெரிவித்தார்.

இந்த விலை திருத்தம் எதிர்வரும் பெப்ரவரி மாதம் 5 ஆம் திகதி முதல் அமலுக்கு வரும் என்றும், உலக சந்தையில் ஏற்படும் விலை உயர்வுக்கு ஏற்ப முடிவு எடுக்கப்படும் என்றும் அவர் மேலும் தெரிவித்தார்.

12.5 கிலோகிராம் நிறையுடைய லிட்ரோ எரிவாயு சிலிண்டரின் விலை 201 ரூபாவால் குறைக்கப்பட்டு தற்போது 4,409 ரூபாவுக்கு விற்பனைசெய்யப்பட்டு வருகின்றது. 

அத்துடன் 5 கிலோ நிறையுடைய எரிவாயு சிலிண்டரின் விலை 80 ரூபாவால் குறைக்கப்பட்டு 1,870 ரூபாவுக்கு விற்பனை செய்யப்பட்டு வருகின்றது.

இதேவேளை, 2.3 கிலோ எடை கொண்ட சிலிண்டர் 38 ரூபாவால் குறைக்கப்பட்டு 822 ரூபாவுக்கு விற்பனை செய்யப்பட்டு வருகின்றமை குறிப்பிடத்தக்கது.