போதைப் பொருள் குற்றவாளிகளை சுற்றிவளைத்த பொலிஸாரை சுற்றிவளைத்து தாக்குதல்! ஒரு பொலிஸ் அதிகாரி காயம், 6 பெண்கள் கைது..

போதைப் பொருள் சந்தேகநபர்களை கைது செய்ய முயற்சிக்கும்போது பொலிஸாரை சுற்றிவளைத்து தாக்குதல் நடத்திய குற்றச்சாட்டில் 6 பெண்களை பொலிஸார் கைது செய்துள்ளனர். 

குறித்த சம்பவம் நேற்று அனுராதபுரம் - புபுதுபுர பகுதியில் இடம்பெற்றிருக்கின்றது. அனுராதபுரம் குற்றப் புலனாய்வுப் பிரிவின் அதிகாரிகள் குழு 

புபுதுபுர பிரதேசத்தில் மேற்கொண்ட சுற்றிவளைப்பின்போது 14 கிராம் 220 மில்லிகிராம் ஹெரோயினுடன் நான்கு சந்தேக நபர்களை கைது செய்துள்ளனர்.

கைது செய்யப்பட்ட சந்தேக நபர்களை பொலிஸ் நிலையத்திற்கு அழைத்துச் செல்ல தயாரான போது, ​​அவ்விடத்திற்கு வந்த சந்தேக நபர்களின் உறவினர்கள் 6 பேர் பொலிஸ் உத்தியோகத்தர்களை கற்களால் தாக்கியுள்ளனர்.

தாக்குதலில் காயமடைந்த பொலிஸ் உத்தியோகத்தர் சிகிச்சைக்காக அனுராதபுரம் பொது வைத்தியசாலையில் அனுமதிக்கப்பட்டுள்ளதாக தெரிவிக்கப்படுகின்றது.

பொலிஸ் அதிகாரிகளின் கடமைக்கு இடையூறு விளைவித்தமை, சட்டவிரோதமான ஒன்று கூடியமை மற்றும் கற்களால் தாக்கி காயங்களை ஏற்படுத்திய குற்றங்களுக்காக 

குறித்த ஆறு பெண்களும் கைது செய்யப்பட்டுள்ளனர். கைது செய்யப்பட்ட சந்தேக நபர்கள் இன்று (17) அனுராதபுரம் நீதவான் நீதிமன்றில் ஆஜர்படுத்தப்படவுள்ளனர்.