பாடசாலைக்குள் புகுந்து தரம் 5 மாணவர்கள் மீது தாக்குதல்/ மின் அதிர்ச்சி கொடுத்து துன்புறுத்தல்! பொலிஸார், அதிபர், ஆசிரியர் உட்பட 5 பேர் கைது...

பாடசாலைக்குள் நுழைந்து தரம் 5 மாணவர்கள் மீது தாக்குதல் நடத்தியதுடன், குழந்தைகளுக்கு மின் அதிர்ச்சி கொடுத்த குற்றச்சாட்டில் 3 பொலிஸ் உத்தியோகஸ்த்தர்கள் மற்றும் பாடசாலை அதிபர் ஆகியோர் கைது செய்யப்பட்டுள்ளனர். 

ஹொரணை - மில்லனிய பிரதேசத்தில் அமைந்துள்ள பாடசாலையொன்றில், வகுப்பாசிரியரின் பணத்தை களவாடியதாகத் தெரிவித்து மாணவர்கள் இருவர் தாக்கப்பட்டமை தொடர்பில் தேசிய சிறுவர் பாதுகாப்பு அதிகாரசபை தீவிர நடவடிக்கையில் களமிறங்கியிருந்தது. 

இந்நிலையில் மூன்று பொலிஸ் உத்தியோகத்தர்களும், பாடசாலை அதிபர் மற்றும் ஆசிரியர் ஒருவரும் கைது செய்யப்பட்டுள்ளனர். சம்பவம் தொடர்பில் பாணந்துறை பிராந்தியத்திற்கு பொறுப்பான பொலிஸ் அத்தியட்சகரின் தலைமையில்  விசாரணைகள் முன்னெடுக்கப்பட்டு வந்தன. 

ஆசிரியரின் பையிலிருந்த பணத்தை களவாடியதாகக் குற்றஞ்சாட்டி, மாணவர்கள் சிலரை நூலகத்திற்குள் அழைத்துச் சென்று அதிபர் மற்றும் ஆசிரியர் ஆகியோர் தாக்கியுள்ளதாக தெரிவிக்கப்படுகின்றது. சம்பவம் தொடர்பில் அதிபரால் செய்யப்பட்ட முறைப்பாட்டிற்கு அமைய, 

குறித்த மாணவர்கள் பொலிஸ் நிலையத்திற்கு அழைத்து செல்லப்பட்டுள்ளனர். பொலிஸ் நிலையத்திற்கு மாணவர்களை அழைத்துச் சென்ற சந்தர்ப்பத்தில் ஜீப் வண்டியிலிருந்த 3 மாணவர்கள் மீது மின்சாரம் தாக்கியுள்ளதாக தேசிய சிறுவர் பாதுகாப்பு அதிகார சபையின் விசாரணைகளில் தெரியவந்தது.

இந்நிலையிலேயே மூன்று பொலிஸ் உத்தியோகத்தர்களும், பாடசாலை அதிபர் மற்றும் ஆசிரியர் ஒருவரும் கைது செய்யப்பட்டனர்.