3 ஆவது எல்.பி.எல் கிரிக்கெட் போட்டி!! -டிசம்பர் 6 இல் ஆரம்பம்-
ஸ்ரீலங்கா கிரிக்கெட் நிறுவனத்தினால் ஏற்பாடு செய்யப்பட்டுள்ள 3 ஆவது லங்கா பிறீமியர் லீக் (எல்.பி.எல்) கிரிக்கெட் போட்டி டிசம்பர் 6 ஆம் திகதி ஆரம்பமாகவுள்ளது.
நடப்பு சம்பியன் ஜெவ்னா கிங்ஸ், கலம்போ ஸ்டார்ஸ், கண்டி பெல்கன்ஸ், காலி க்ளடியேட்டர்ஸ், தம்புள்ள ஜயன்ட்ஸ் ஆகிய 5 அணிகள் பங்குபற்றுகின்றன.
இவ் வருடம் லங்கா பிறீமியர் லீக் (எல்.பி.எல்) போட்டிகள் அம்பாந்தோட்டை, மஹிந்த ராஜபக்ஷ சர்வதேச கிரிக்கெட் விளையாட்டரங்கு, கண்டி, பல்லேகலை சர்வதேச கிரிக்கெட் விளையாட்டரங்கு, கொழும்பு ஆர். பிரேமதாச சர்வதேச கிரிக்கெட் விளையாட்டரங்கு ஆகிய 3 மைதானங்களில் நடைபெறவுள்ளன.
ஒவ்வொரு அணியும் ஒன்றையொன்று இரண்டு தடவைகள் சந்திப்பதுடன் மொத்தம் 20 லீக் போட்டிகள் நடைபெறும். இறுதிச் சுற்றில் 4 போட்டிகள் நடைபெறும். லீக் சுற்று போட்டிகள் டிசம்பர் 6 ஆம் திகதியிலிருந்து டிசம்பர் 19ஆம் திகதிவரை இரண்டு கட்டங்களாக நடத்தப்படும்.
டிசம்பர் 21 ஆம் திகதி முதலாவது தகுதிகாண் (அரை இறுதி) போட்டியும் நீக்கல் போட்டியும் 22 ஆம் திகதி 2 ஆவது தகுதிகாண் (அரை இறுதி) போட்டியும் நடைபெறவுள்ளன. இறுதிப் போட்டி டிசம்பர் 23 ஆம் திகதி நடைபெறவுள்ளமை குறிப்பிடத்தக்கது.