ரி-20 கிரிக்கெட்டில் இரட்டைச் சதம்!! -22 சிக்ஸர்கள் அடித்த மே.இ. தீவுகள் வீரர்-

இருபதுக்கு இருவது கிரிக்கெட் போட்டியில் மேற்கிந்தியதீவுகள் அணியின் வீரர் ஒருவர் இரட்டைச் சதம் அடித்து அசத்தியுள்ளார். 

அமெரிக்காவில் நடைபெறும் அட்லாண்டா ஓபன் என்கிற ரி-20 போட்டியில் பங்கேற்ற பிரபல மேற்கிந்தியதீவுகள் அணியின் சகலதுறை ஆட்க்காரரான ரஹீம் கார்ன்வெல், இரட்டைச் சதமெடுத்து அசத்தியுள்ளார். 

அட்லாண்டா பயர் அணியில் விளையாடும் கார்ன்வெல், 77 பந்துகளில் 22 சிக்ஸர்கள், 17 பவுண்டரிகளுடன் ஆட்டமிழக்காமல் 205 ஓட்டங்களைப் பெற்றுள்ளார். 

இதனால் அட்லாண்டா அணி 20 ஓவர்களில் ஒரு விக்கெட் இழப்புக்கு 326 ஓட்டங்களை குறித்துள்ளது. கடினமான இலக்கை விரட்ட முடியாமல் ஸ்கொயர் டிரைவ் அணி 172 ஓட்டங்கள் வித்தியாசத்தில் தோற்றது. 

29 வயது கார்ன்வெல் இன்னும் மேற்கிந்திய தீவுகளின் வெள்ளைப் பந்து அணிக்குத் தேர்வாகவில்லை. இதுவரை 9 டெஸ்டுகளில் விளையாடியுள்ளார். 

ஐ.சி.சியால் அங்கீகரிக்கப்படாத போட்டியில் கார்ன்வெல் இந்த ஓட்டங்களை எடுத்ததால் இது சாதனைப் பட்டியலில் இடம்பெறாது. ரி-20 கிரிக்கெட்டில் அதிக ஓட்டங்களை எடுத்தவராக கிறிஸ் கெயில் தொடர்ந்து நீடிக்கிறார். 2013 ஐ.பி.எல் போட்டியில் ஆர்.சி.பி அணிக்காக விளையாடி 175 ஓட்டங்கள் எடுத்தார் கெயில்.