ஆசிய கிண்ண ரி-20 தொடர்!! -வேகப்பந்துவீச்சாளர்களை கொண்ட இலங்கை அணி அறிவிப்பு-

ஐக்கிய அரபு இராச்சியத்தில் நடைபெறவுள்ள ஆசிய கிண்ண ரி-20 கிரிக்கெட் போட்டியில் விளையாடுவதற்காக தெரிவுசெய்யப்பட்டுள்ள 18 பேர் கொண்ட இலங்கை குழாத்தில் இடதுகை வேகப்பந்து வீச்சாளர் டில்ஷான் மதுஷன்க, வலதுகை வேகப்பந்து வீச்சாளர் மதீஷ பத்திரண, சுழல்பந்துவீச்சாளர் நுவனிது பெர்னாண்டோ ஆகியோர்  பெயரிடப்பட்டுள்ளார்.

இலங்கை ரி-20 அணியில் அவர்கள் மூவரும் இடம்பெறுவது இதுவே முதல் தடவையாகும். விளையாட்டுத்துறை அமைச்சரின் அங்கீகாரம் கிடைத்தால் அசித்த பெர்னாண்டோவும் ரி-20 இல் புதிய வீரராக இடம்பெறுவார்.

விக்கெட் காப்பாளரும் துடுப்பாட்டக்காரருமான தினேஷ் சந்திமால், சகலதுறை வீரர் தனஞ்சய டி சில்வா, வேகப்பந்துவீச்சாளர் அசித்த பெர்னாண்டோ, மத்திய வரிசை வீரர் அஷேன் பண்டார, சுழற்பந்து வீச்சாளர் ஜெவ்றி வெண்டர்சே ஆகியோர் மீண்டும் இலங்கை குழாத்தில் இணைத்துக் கொள்ளப்பட்டுள்ளனர்.

குழாத்தில் பெயரிடப்பட்டிருந்த வேகப்பந்து வீச்சாளர்கள் பினுர பெர்னாண்டோ, கசுன் ராஜித்த ஆகிய இருவரும் உபாதைக்குள்ளாகி இருப்பதால் அவருக்குப் பதிலாக அசித்த பெர்னாண்டோ, ப்ரமோத் மதுஷான் ஆகியோர் பெயரிடப்பட்டு விளையாட்டுத்துறை அமைச்சரின் அங்கீகாரத்துக்கு சமர்ப்பிக்கப்பட்டுள்ளதாக ஸ்ரீலங்கா கிரிக்கெட் நிறுவனம் தெரிவித்தது.

அவர்கள் இருவருக்கும் குழாத்தில் இடம்கிடைத்தால் அவர்களும் அறிமுக வீரர்களாக இடம்பெறுவர். துடுப்பாட்டத்தைப் பொறுத்த மட்டில் தனுஷ்க குணதிலக்க, பெத்தும் நிஸ்ஸன்க, குசல் மெண்டிஸ் ஆகியோர் முன்வரிசையில் இடம்பெறுவர்.

பானுக்க ராஜபக்ஷ, தினேஷ் சந்திமால், சரித் அசலன்க, தனஞ்சய டி சில்வா, அணித் தலைவர் தசுன் ஷானக்க, அஷேன் பண்டார, வனிந்து ஹசரங்க, சாமிக்க கருணாரட்ன ஆகியோர் மத்திய வரிசையில் துடுப்பாட்டத்தைப் பலப்படுத்தக்கூடியவர்கள்.

அவர்களில் தசுன் ஷானக்க, வனிந்து ஹசரங்க, சாமிக்க கருணாரட்ன ஆகிய மூவரும இறுதி அணியில் இடம்பெறுவது உறுதி.

துஷ்மன்த சமீர, மஹீஷ் தீக்ஷன, ஜெவ்றி வெண்டர்சே, ப்ரவீன் ஜயவிக்ரம, மதீஷ பத்திரண, நுவனிது பெர்னாண்டோ, அசித்த பெர்னாண்டோ, ப்ரமோத் மதுஷான், டில்ஷான் மதுஷன்க, ஆகியோர் பந்துவீச்சாளர்களாக இடம்பெறுகின்றனர்.