2 ஆவது ஒருநாள் போட்டியிலும் வெற்றி!! -ஜிம்பாப்வேக்கு எதிரான தொடரை கைப்பற்றியது இந்தியா-

இரண்டாவது ஒரு நாள் போட்டியில் ஜிம்பாப்வே அணியை வெற்றி கொண்ட இந்தியா கிரிக்கெட் அணி 14 ஆவது தொடர் வெற்றியை பதிவு செய்துள்ளது. 

இரு அணிகளுக்கும் இடையேயான இரண்டாவது ஒரு நாள் போட்டி இன்று நடைபெற்றது. நாணயசுழல்ச்சியில் வெற்றி பெற்ற இந்திய அணி பந்து வீச்சை தேர்வு செய்தது.

அதன்படி, முதலில் துடுப்பெடுத்தாடிய ஜிம்பாப்வே 38.1 ஓவரில் 161 ஓட்டங்களுக்குள் சகல விக்கெட்டுக்களையும் இழந்தது. சீன் வில்லியம்ஸ் 42 ஓட்டத்துடன் ஆட்டமிழந்தார். ரியான் பர்ல் 39 ஓட்டத்துடன் ஆட்டமிழக்காமல் இருந்தார்.  இந்தியா சார்பில் ஷர்துல் தாக்குர் 3 விக்கெட் வீழ்த்தினார்.

இதையடுத்து, 162 ஓட்டங்கள் எடுத்தால் வெற்றி என்ற இலக்குடன் இந்திய அணி களமிறங்கியது. ஆரம்ப ஆட்டக்காரர் அணித்தலைவர் ராகுல் ஒரு ஓட்டத்துடன் ஆட்டமிழந்து அதிர்ச்சி அளித்தார்.

ஷிகர் தவான், {ப்மன் கில் தலா 33 ஓட்டங்களை எடுத்தனர். இஷான் கிஷன் 6 ஓட்டத்துடன் ஆட்டமிழந்தார். தீபக் ஹூடா 25 ஓட்டத்துடன் வெளியேறினார்.

இறுதியில், இந்தியா 25.4 ஓவரில் 5 விக்கெட் இழப்புக்கு 167 ஓட்டங்களை எடுத்து அபார வெற்றி பெற்றது. சஞ்சு சாம்சன் 43 ஓட்டமிழக்காமல் இருந்தார். இந்த வெற்றியின் மூலம் இந்தியா 2-0 என ஒருநாள் தொடரை கைப்பற்றியுள்ளது.