கடனை அடைப்பதற்காக மத்திய கிழக்கு நாட்டுக்கு செல்ல முயற்சித்த பெண்..! தாய் மறுத்ததால் 4 வயது மகனை கொன்றுவிட்டு தானும் தற்கொலை..

கடனை தீர்ப்பதற்காக மத்திய கிழக்கு நாடு ஒன்றுக்கு செல்வதற்கு முயற்சித்தபோது தாயார் அனுமதிக்காமையினால் பெண் ஒருவர் தனது மகனை கொலை செய்துவிட்டு தானும் தற்கொலை செய்துகொண்டுள்ளார். 

குறித்த சம்பவம் கந்தர பிரதேசத்தில் இடம்பெற்றுள்ளதாக பொலிஸ் ஊடக பேச்சாளர் பிரதி பொலிஸ்மா அதிபர் அஜித் ரோஹண கூறியுள்ளார். இது குறித்து அவர் மேலும் கூறுகையில், கந்தர பொலிஸ் பிரிவுக்குட்பட்ட பங்கலாவத்த பகுதியில் அமைந்துள்ள வீடொன்றில் 

நேற்று ஞாயிற்றுக்கிழமை பெண்ணொருவரும் அவரது மகனும் சடலமாக மீட்கப்பட்டனர். பங்கலாவத்த பகுதியைச் சேர்ந்த 24 வயதுடைய பெண்ணொருவரும் 4 வயதுடைய அவரது மகனுமே இவ்வாறு சடலங்களாக மீட்கப்பட்டுள்ளனர். உயிரிழந்த பெண்ணின் கணவன் மீன்பிடி தொழில் ஈடுபடுபவராவார். 

அவர் சம்பவ தினத்தன்று தொழிலுக்காக கடலுக்குச் சென்றுள்ளார். குறித்த பெண் கடிதமொன்றை எழுதி வைத்துவிட்டு தனது மகனின் கழுத்தை சேலையால் இறுக்கி கொலை செய்துள்ளதோடு , அவரும் தூக்கிட்டு தற்கொலை செய்துக் கொண்டுள்ளார்.

பெற்ற கடன்களை மீள செலுத்துவதற்காக அந்த பெண் மத்திய கிழக்கு நாடொன்றில் சென்று தொழில் புரிவதற்காக தனது தாயிடம் அனுமதிக் கேட்டுள்ளார். அதற்கு அவரது தாயார் மறுப்பு தெரிவித்தமையினாலேயே அவர் இவ்வாறு தற்கொலை 

செய்துக்கொண்டுள்ளதாக பொலிஸாரின் விசாரணைகளின் போது தெரியவந்துள்ளது. குறித்தச் சம்பவம் தொடர்பில் தொடர்ந்தும் விசாரணைகள் முன்னெடுக்கப்பட்டு வருகின்றன பொலிஸ் ஊடகப் பேச்சாளர் தெரிவித்துள்ளார்.