காணாமல் ஆக்கப்பட்டோரின் உறவுகள் திருகோணமலையில் போராட்டம்!

திருகோணமலையில் முன்னெடுக்கப்பட்டு வரும் காணாமல் ஆக்கப்பட்டோரின் உறவுகளின் போராட்டம் 2 வருடத்தை கடந்துள்ளதை முன்னிட்டு, கிழக்கு மாகாண ஆளுநர் செயலகத்திற்கு முன்பாக இன்று கவனயீர்ப்பு போராட்டமும் கையெழுத்து வேட்டையும் முன்னெடுக்கப்பட்டது.

இதன்போது தங்களுக்கு தீர்வினைப் பெற்றுத்தருமாறு கோரி காணாமல் ஆக்கப்பட்டோரின் உறவுகள் ஆர்ப்பாட்டத்தில் ஈடுபட்டதுடன், கையெழுத்து வேட்டையையும் முன்னெடுத்தனர். இந்த ஆர்ப்பாட்டத்தில் கிழக்கு மற்றும் வடக்கு மாகாணங்களைச் சேர்ந்த கடத்தப்பட்டு காணாமல் ஆக்கப்பட்டோரின் உறவினர்கள் கலந்து கொண்டனர்.

குறித்த போராட்டத்தின் முடிவில் ஆளுநர் செயலகத்திலிருந்து திருகோணமலை பத்திரகாளி அம்மன் கோயிலுக்கு ஊர்வலமாக சென்று வழிபாட்டில் ஈடுபட்டனர். கையெழுத்திடப்பட்ட படிவங்கள் ஜெனீவாவிற்கு அனுப்பி வைக்கப்படவிருப்பதாக கடத்தப்பட்டு காணாமல் ஆக்கப்பட்டோரின் திருகோணமலை மாவட்ட சங்கத்தலைவி நாகேந்திரன் ஆஷா தெரிவித்தார்.