பிரேசில் ஜனாதிபதி தேர்தல்!! -இடதுசாரி தலைவர் லுலு டா சில்வா வெற்றி-

பிரேசிலில் நடைபெற்ற ஜனாதிபதி தேர்தலில் இடதுசாரி தலைவரும், முன்னாள் ஜனாதிபதியுமான லூயிஸ் இனாசியோ லுலா டா சில்வா வெற்றி பெற்றுள்ளார்.

அந்நாட்டின் கடந்த ஒக்டோபர் 2 ஆம் திகதி ஜனாதிபதி தேர்தல் நடந்தது. இத் தேர்தலில் தற்போதைய ஜனாதிபதி ஜெயீர் போல்சனரோ உள்பட மொத்தம் 9 பேர் ஜனாதிபதி பதவிக்கான போட்டியில் களத்தில் இருந்தனர்.

எனினும் தீவிர வலதுசாரியான ஜெயீர் போல்சனரோவுக்கும், முன்னாள் ஜனாதிபதியும் ஊழல் வழக்கில் சிறைவாசம் அனுபவித்து விட்டு வந்துள்ள இடதுசாரி வேட்பாளருமான லூயிஸ் இனாசியோ லுலா டா சில்வாவுக்கும் இடையில்தான் பலபரீட்சை நடந்தது.

தேர்தலுக்கு முந்தைய கருத்து கணிப்புகள் சில்வாவுக்கு வெற்றி வாய்ப்பு பிரகாசமாக இருப்பதாக தெரிவித்தன. கொரோனா தொற்றை கையாண்ட முறை, அமசோன் மழைக்காடுகள் அழிப்பு உள்ளிட்ட விவகாரங்களில் ஜெயீர் போல்சனரோ அரசு மக்களிடம் கடும் எதிர்ப்புகளையும், விமர்சனங்களையும் எதிர்கொண்டதால் இந்த தேர்தலில் அவரது வெற்றி வாய்ப்பு கேள்விக்குறியாக இருந்தது.

இந்த நிலையில், பிரேசில் தேர்தலில் பதிவான வாக்குகள் எண்ணப்பட்டு நேற்று ஞாயிற்றுக்கிழமை முடிவுகள் அறிவிக்கப்பட்டன. இதில் தற்போதைய ஜனாதிபதி ஜெயீர் போல்சனரோ 49.10 சதவீத வாக்குகள் பெற்று தோல்வியை தழுவினார்.

இடதுசாரி தலைவரும், முன்னாள் ஜனாதிபதியுமான லுலு டா சில்வா 50.90 சதவீத வாக்குகள் பெற்று மீண்டும் பிரேசில் ஜனாதிபதியாக வெற்றிபெற்றுள்ளார். புதிய ஜனாதிபதியாக தேர்வான லுலு டா சில்வா அடுத்த ஆண்டு ஜனவரி மாதம் பதவியேற்க உள்ளார்.

பிரேசில் தேர்தல் நடைமுறையின் படி ஜனாதிபதி தேர்தலில் போட்டியிடும் வேட்பாளர் 50 சதவீதத்துக்கும் அதிகமான வாக்குகளை பெற வேண்டும் என்பது குறிப்பிடத்தக்கது.