கனடாவில் ஆபத்தான கொலையாளி என அடையாளப்படுத்தப்பட்ட தமிழர்!! -தேடுதலை தீவிரப்படுத்திய பொலிஸ்-

கனடாவில் கொலை குற்றத்துடன் தொடர்புடையவர் என சந்தேகிக்கப்படும் தமிழர் ஒருவரை ஆபத்தானவர் என்று அடையாளப்படுத்தி அந்நாட்டு பொலிஸார் தேடி வருகின்றனர். 

34 வயதான ரியான் என்ற பெயரால் அறியப்படும் சதீஸ்குமார் ராஜரத்தினம் மீது சனிக்கிழமை காலை 11.40 மணியளவில் ஒருவர் கத்தியால் குத்தப்பட்டு கொலை செய்யப்பட்ட சம்பவத்தின் இரண்டாம் நிலை கொலை குற்றச்சாட்டு பதிவாகியுள்ளது.

உயிரிழந்தவர் டொராண்டோவை சேர்ந்த 38 வயதான லியோன் டைரெல் என பொலிஸார் அடையாளம் கண்டுள்ளனர். இந்த சம்பவம் தொடர்பில் இரண்டாம் நிலை கொலைக்காக தேடப்பட்டு வரும் சதீஸ்குமார் ராஜரத்தினத்திற்கு கனடா முழுவதும் பிடியாணை பிறப்பிக்கப்பட்டுள்ளது.

அவர் ஆறடி-ஒரு அங்குல உயரம், மெல்லிய உடலமைப்பு, பழுப்பு நிற கண்கள் மற்றும் இருபுறமும் மொட்டையடிக்கப்பட்ட கருமையான கூந்தல் என விவரிக்கப்படுகிறார். அவர் மார்பு மற்றும் தோள்கள் இரண்டிலும் பச்சை குத்தியுள்ளார்.

ராஜரத்தினம் ஆயுதம் ஏந்தியதாக நம்பப்படுவதாகவும் அவர் வன்முறையாளர் மற்றும் ஆபத்தானவராகக் கருதப்படுவதாகவும் பொலிஸார் தெரிவிக்கின்றனர். தகவல் தெரிந்தவர்கள் பொலிஸ் அல்லது குற்றத் தடுப்பாளர்களை தொடர்பு கொள்ளுமாறு கேட்டுக் கொள்ளப்படுகிறார்கள்.