அவுஸ்ரேலியானை திணறவைத்த ப்ரபாத் ஜயசூரிய!! -பாகிஸ்தானுக்கு எதிரான டெஸ்ட் குழாமில் இணைப்பு-

அவுஸ்ரேலியாவுக்கு எதிரான 2 ஆவது டெஸ்ட் போட்டிக்கான குழாத்தில் இறுதி நேரத்தில் இணைக்கப்பட்டு இலங்கைக்கு இன்னிங்ஸ் வெற்றியை ஈட்டிக்கொடுத்த சாதனை நாயகன் ப்ரபாத் ஜயசூரிய, பாகிஸ்தானுக்கு எதிரான டெஸ்ட் தொடருக்கான இலங்கை குழாத்திலும் பெயரிடப்பட்டுள்ளார்.

தனது அறிமுக டெஸ்ட் போட்டியில் அவுஸ்ரேலியாவுக்கு எதிராக இரு இன்னிங்ஸ்களிலும் தலா 6 விக்கெட்களைக் கைப்பற்றி இலங்கையின் வெற்றியில் பிரதான பங்காற்றிய ப்ரபாத் ஜயசூரிய, நாளை மறுதினம் காலியில் ஆரம்பமாகவுள்ள முதலாவது டெஸ்ட் போட்டியிலும் சாதிப்பார் என நம்பப்படுகின்றது.

இதேவேளை, அவுஸ்ரேலியாவுடனான 2 ஆவது டெஸ்ட் போட்டி ஆரம்பமாவதற்கு முன்னர் கொவிட்டினால் பாதிக்கப்பட்டு தனிமைப்படுத்தப்பட்ட தனஞ்சய டி சில்வா போட்டியின்போது கோவிட்டினால் பாதிக்கப்பட்டு தனிமைப்படுத்தப்பட்ட பெத்தும் நிஸ்ஸன்க ஆகியோர் மீண்டும் குழாத்தில் இணைத்துக்கொள்ளப்பட்டுள்ளனர்.

அவுஸ்ரேலியாவுக்கு எதிரான 2 ஆவது டெஸ்ட் போட்டியில் மற்றொரு அறிமுக வீரர் கமிந்து மெண்டிஸ் அரைச் சதம் குவித்து அசத்தினார். அவர் தனஞ்சய டி சில்வாவுக்குப் பதிலாகவே அணியில் இணைத்துக்கொள்ளப்பட்டார்.

இதேவேளை, அவுஸ்ரேலியாவுக்கு எதிரான தொடரில் விளையாடிய வீரர்கள் பாகிஸ்தானுக்கு எதிரான தொடரிலும் இடம்பெறுகின்றனர்.

பாகிஸ்தானுக்கு எதிரான 2 போட்டிகள் கொண்ட டெஸ்ட் தொடரை முன்னிட்டு திமுத் கருணாரட்ன தலைமையிலான இலங்கை டெஸ்ட் குழாத்தில் 18 வீரர்கள் இடம்பெறுகின்றனர்.

இந்த டெஸ்ட் தொடரானது 2021 - 2023 சுழற்சிக்கான ஐ.சி.சி உலக டெஸ்ட் சம்பியன்ஷிப் தொடராகவும் அமைகின்றது.

இலங்கைக்கும் பாகிஸ்தானுக்கும் இடையிலான முதலாவது டெஸ்ட் கிரிக்கெட் போட்டி காலி சர்வதேச விளையாட்டரங்கில் 16 ஆம் திகதி ஆரம்பமாகவுள்ளது.

இதன்படி இலங்கை டெஸ்ட் குழாமில் திமுத் கருணாரட்ன (தலைவர்), பெத்தும் நிஸ்ஸன்க, ஓஷத பெர்னாண்டோ, ஏஞ்சலோ மெத்யூஸ், குசல் மெண்டிஸ், தனஞ்சய டி சில்வா, கமிந்த மெண்டிஸ், நிரோஷன் திக்வெல்ல, தினேஷ் சந்திமால், ரமேஷ் மெண்டிஸ், மஹீஷ் தீக்ஷன, கசுன் ராஜித்த, விஷ்வா பெர்னாண்டோ, அசித்த பெர்னாண்டோ, டில்ஷான் மதுஷன்க, ப்ரபாத் ஜயசூரிய, துனித் வெல்லாலகே, ஜெவ்றி வெண்டர்சே ஆகியோர் இணைக்கப்பட்டுள்ளனர்.