எல்.பி.எல் பிறீமியர் லீக் 3 ஆவது அத்தியாயம்!! -ஆகஸ்ட் முதலாம் திகதி ஆரம்பம்-

ஸ்ரீலங்கா கிரிக்கெட் நிறுவனம் ஏற்பாடு செய்துள்ள 3 ஆவது லங்கா பிறீமியர் லீக் (எல்.பி.எல்) ரி-20 கிரிக்கெட் சுற்றுப் போட்டி நடப்பு சம்பியன் ஜெவ்னா கிங்ஸ் மற்றும் 2 ஆம் இடத்தைப் பெற்ற கோல் க்ளடியேட்டர்ஸ் அணிகளுக்கு இடையிலான போட்டியுடன் ஆகஸ்ட் முதலாம் திகதி ஆரம்பமாகவுள்ளது.

இந்த இரண்டு அணிகளுடன் கலம்போ ஸ்டார்ஸ், தம்புள்ள ஜயன்ட்ஸ், கண்டி பெல்கன்ஸ் ஆகிய அணிகளும் பங்பற்றுகின்றன.

ஒவ்வொரு அணியும் ஒன்றையொன்று இரண்டு தடவைகள் எதிர்த்தாடும் வகையில் இரண்டு சுற்றுகளாக நடத்தப்படும் லீக் சுற்றில் முதல் 14 போட்டிகள் கொழும்பு ஆர். பிரேமதாச விளையாட்டரங்கில் ஆகஸ்ட் முதலாம் திகதியிலிருந்து ஆகஸ்ட் 10 ஆம் திகதிவரை நடைபெறும்.

அடுத்த 6 போட்டிகள் ஹம்பாந்தோட்டை மஹிந்த ராஜபக்ஷ சர்வதேச கிரிக்கெட் விளையாட்டரங்கில் ஆகஸ்ட் 10 ஆம் திகதியிலிருந்து ஆகஸ்ட் 17 ஆம் திகதிவரை நடைபெறும்.

பகல்வேளை போட்டிகள் பிற்பகல் 3 மணிக்கும் இரவுவேளை போட்டிகள் இரவு 7.30 மணிக்கும் ஆரம்பமாகும். இறுதிச் சுற்று போட்டிகளும் ஹம்பாந்தோட்டையில் நடத்தப்படும்.

முதலாவது தகுதிகாண் (அரை இறுதி) போட்டி, நீக்கல் போட்டி என்பன ஆகஸ்ட் 17ஆம் திகதியும் இரண்டாவது தகுதிகாண் (அரை இறுதி) போட்டி  ஆகஸ்ட் 19 ஆம் திகதியும் நடைபெறும். மூன்றாவது எல்.பி.எல் அத்தியாயத்தின் சம்பியனைத் தீர்மானிக்கும் இறுதிப் போட்டி ஆகஸ்ட் 21 ஆம் திகதி நடைபெறும்.