ஷேன் வோர்ன் மரணம் இயற்கையானது!! -பிரேத பரிசோதனை அறிக்கை தகவல்-

அவுஸ்திரேலிய கிரிக்கெட் அணியின் முன்னாள் நட்சத்திர சுழல் பந்து வீச்சாளர் ஷேன் வோர்ன் மரணம் இயற்கையானது என்று பிரேத பரிசோதனை அறிக்கை தெரிவிக்கின்றது.

52 வயது சுழற்பந்து வீச்சு ஜாம்பவானான ஷேன் வோர்ன் தாய்லாந்தில் உள்ள தனது சொகுசு பங்களாவில் கடந்த 4 ஆம் திகதி பிணமாக மீட்கப்பட்டார். அசைவின்றி கிடந்த அவருடைய இதயத்தை மீண்டும் துடிக்க வைக்க வைத்தியர்கள் எடுத்த முயற்சிக்கு பலன் எதுவும் கிடைக்கவில்லை. திடீரென ஏற்பட்ட மாரடைப்பு காரணமாக அவர் இறந்ததாக தெரிகிறது.

ஷேன் வோர்னின் மரணத்தை அவரது தனிப்பட்ட விஷயங்களை நிர்வகித்து வரும் நிறுவனம் உறுதி செய்துள்ளது. ஆனால் அவரது மரணத்திற்கான காரணம் என்ன? என்பது உடனடியாக தெரிவிக்கப்படவில்லை.

இதனை தொடர்ந்து ஷேன் வோர்னின் பிரேத பரிசோதனை தாய்லாந்தில் நடத்தப்பட்டது. அதன் முடிவுகள் பற்றி இன்று விவரங்கள் வெளியிடப்பட்டு உள்ளன. அதில், ஷேன் ஷேன் வோர்னின் மரணம் இயற்கையானது என பிரேத பரிசோதனை முடிவில் தெரிய வந்துள்ளது என்று தாய்லாந்து பொலிஸார் தகவல் தெரிவித்து உள்ளனர்.  

இதில், குற்ற செயல் எதுவும் இல்லை. பிரேத பரிசோதனை அறிக்கை பற்றி விரிவாக பின்னர் வெளியிடப்படும் என்று புலனாய்வு அதிகாரிகள் தெரிவித்து உள்ளனர்.