2022 ஐ.பி.எல் ரி-20 தொடருக்கான அட்டவணையை வெளியானது!! -முதல் போட்டியில் சென்னை : கொல்கத்தா அணிகள் மோதல்-

இவ்வாண்டுக்கான 15 ஆவது ஐ.பி.எல் ரி-20 கிரிகெட் தொடர் எதிர்வரும் 26 ஆம் திகதி சனிக்கிழமை ஆரம்பமாக உள்ள நிலையில், அதற்கான போட்டிகளின் அட்டவணையை பி.சி.சி.ஐ வெளியிட்டுள்ளது. 

மொத்தமாக 65 நாட்கள் நடைபெறும் இந்த தொடரில் மொத்தம் 70 லீக் போட்டிகளுடன், 4 பிளே ஒப் போட்டிகளும் நடைபெறுகின்றன. அந்த வகையில் முதல் லீக் போட்டியில் சென்னை சூப்பர் கிங்ஸ் மற்றும் கொல்கத்தா நைட் ரைடர்ஸ் அணிகள் மோதுவுள்ளன.

இந்தப் போட்டி மும்பை வான்கடே மைதானத்தில் நடைபெறவுள்ளது. அத்தோடு கடைசி லீக் போட்டியும், மே மாதம் 22 ஆம் திகதி வான்கடே மைதானத்தில் நடக்கவுள்ளது. இதில் சன்ரைசர்ஸ் ஐதராபாத், பஞ்சாப் கிங்ஸ் அணிகள் விளையாடுகின்றன.

வான்கடே மைதானம் மற்றும் டி.ஒய்.பாட்டீல் ஆகிய மைதானங்களில் தலா 20 லீக் போட்டிகளும், மும்பை பிரபோன் மைதானம் மற்றும் புனே எம்.சி.ஏ சர்வதேச விளையாட்டரங்கில் தலா 15 போட்டிகளும் நடக்கின்றன. இரண்டு போட்டிகள் நடைபெறும் நாட்களில் முதல் போட்டி பிற்பகல் 3.30 மணிக்கும், இரண்டாவது போட்டி இரவு 7.30 மணிக்கும் தொடங்கவுள்ளன. 

லீக் ஆட்டங்களுக்கான அட்டவணை மாத்திரம் இன்று வெளியிடப்பட்டுள்ள நிலையில், பிளேஒப் போட்டிகள் மற்றும் மே 29 ஆம் திகதி நடைபெறும் இறுதிப் போட்டியில் மோதும் அணிகள் மற்றும் மைதானங்கள் பின்னர் அறிவிக்கப்படுமென பி.சி.சி.ஐ அறிவித்துள்ளது.