பாறை இடுக்கில் நாட்கணக்கில் சிக்கிய இளைஞர்!! -உலங்குவானூர்தியின் உதவியுடன் மீட்ப்பு-

இந்தியாவின் கேரளாப் பகுதியில் உள்ள பாலக்காட்டை சேர்ந்தவர் பாபு (வயது 28) என்னும் இளைஞர் வேறு 3 நண்பர்களும் நேற்று முன்தினம் மலம்புழையில் காட்டுப்பகுதிக்குள் மலையேற சென்றனர்.

மதியம் பாபு மலையில் இருந்து இறங்கியபோது, பள்ளமான இடத்தில் பாறை இடுக்குகளுக்குள் தவறி விழுந்தார். அவருடன் சென்றவர்கள் அவரை மீட்க முயற்சி செய்தும் அது முடியாமல் போயுள்ளது. 

இதைத்தொடர்ந்து அவர்கள் மலையில் இருந்து இறங்கி மலம்புழை வனத்துறையினரிடம் தகவல் தெரிவித்தனர். தொடர்ந்து, மலை ஏற்ற வீரர்களும், விபத்து பேரிடர் மீட்பு படையினரும் விரைந்து சென்றனர். ஆனால் பாபு சிக்கியுள்ள இடத்தை அவர்களால் அடையாளம் காணமுடியவில்லை. 

இதைத்தொடர்ந்து ஹெலிகாப்டர் மூலம் தேடும்பணி தொடங்கியது. நீண்ட நேரத்திற்கு பின் வாலிபர் பாபு சிக்கியுள்ள இடம் கண்டுபிடிக்கப்பட்டது. பின் அவரை மீட்க இராணுவம் உதவி கேட்கப்பட்டது. இராணுவம் நேற்று இரவில் இருந்து அவரை மீட்கும் பணியில் ஈடுபட்டது.

இந்த நிலையில், இன்று புதன்கிழமை காலை இளைஞர் பாபு மீட்கப்பட்டார். கடந்த இரு நாட்களாக உணவு, தண்ணீர் இன்றி தவித்த வாலிபர் மீட்கப்பட்டு உலங்குவானூர்தி மூலம் மருத்துவமனைக்கு அழைத்துச் செல்லப்பட்டார்.