பள்ளிவாசல் மீது 2 தடவைகள் பெற்றோல் குண்டு வீசிய நபர் கைது! எறிந்த இரு குண்டுகளும் பள்ளிவாசலுக்குள் விழுந்தபோதும் வெடிக்கவில்லை..

கொழும்பு - பம்பலப்பிட்டி பகுதியில் உள்ள போரா முஸ்லிம்களின் பள்ளிவாசல் மீது பெற்றோல் குண்டு வீசுவதற்கு முயற்சித்த குற்றச்சாட்டில் கைது செய்யப்பட்ட நபரை 23ம் திகதிவரை விளக்கமறியலில் வைக்க கொழும்பு மேலதிக நீதிவான் ஷானி பெரேரா உத்தரவிட்டிருக்கின்றார். 

எதிமலே வீதியைச் சேர்ந்த ஹூசேமா அப்பாஸ் கென்போய் என்பவரே இவ்வாறு விளக்கமறியலில் வைக்கப்பட்டுள்ளார். இந்த சம்பவம் தொடர்பில் மேலும் தெரியவருவதாவது, குறித்த நபர் நேற்று முன்தினம் (09) காலை அவரின் வீட்டிலிருந்து பெற்றோல் குண்டொன்றை எடுத்து வந்து, 

பம்பலப்பிட்டி போரா முஸ்லிம் பள்ளிவாசலில் வெடிக்கச் செய்துள்ளார். அந்த பெற்றோல் குண்டு வெடிக்காமையினால் மீண்டும் வீட்டுக்குச் சென்று இன்னுமொரு பெற்றோல் குண்டுடொன்றை எடுத்துவந்து பள்ளிவாசலில் வெடிக்கச் செய்ய முயற்சித்துள்ளதாக பம்பலப்பிட்டி பொலிஸார் நீதிமன்றத்துக்கு அறிவித்துள்ளனர். 

எவ்வாறாயினும், இராண்டாவது முறையாகவும் கொண்டுவந்து வெடிக்கச் செய்த பெற்றோல் குண்டு வெடிப்புக்குள்ளாகவில்லை என்பதுடன் சந்தேகநபர் இந்த சம்பவம் தொடர்பில் தகவல் வழங்க மறுப்பதாகவும் பொலிஸார் நீதிமன்றத்துக்கு அறிவித்துள்ளனர்.