ராஸ்மிகாவை சந்திக்க 900 கி.மீ பயணம் செய்த ரசிகர்!!

தெலுங்கு திரையுலகில் முன்னணி நடிகையாக உள்ள ராஸ்மிகா அண்மையில் வெளிவந்த கார்த்தியின் சுல்தான் படம் மூலம் தமிழில் அறிமுகமானார். ராஸ்மிகாவுக்கு தமிழ்நாடு, ஆந்திரா, கர்நாடகா உள்ளிட்ட மாநிலங்களில் அதிக அளவிலான இளம் ரசிகர்கள் உள்ளனர்.

இந்நிலையில் தெலங்கானா மாநிலத்தைச் சேர்ந்த ஆகாஸ் திரிபாதி என்ற ரசிகர் ஒருவர் 900 கி.மீ தூரம் பயணித்து ராஸ்மிகாவின் சொந்த ஊருக்குச் சென்று அவரை நேரில் சந்திக்க முடிவு செய்தார். 

இருப்பினும் அவரால் ராஸ்மிகாவின் வீட்டை கண்டுபிடிக்க முடியவில்லை. பல்வேறு இடங்களில், அவரது வீட்டு விலாசம் கேட்டு விசாரித்துள்ளார். இதனால் சந்தேகமடைந்த சிலர், இது குறித்து பொலிஸாருக்கு தகவல் தெரிவித்தனர். 

இதையடுத்து அவரை பிடித்து விசாரணை நடத்திய பொலிஸார் குடகு மாவட்டத்தில் தற்போது ஊரடங்கு பிறப்பிக்கப்பட்டுள்ளதால், அவருக்கு அறிவுரை கூறி தெலங்கானாவுக்கு திருப்பி அனுப்பினர். 

மும்பையில் படப்பிடிப்பில் இருந்த நடிகை ராஸ்மிகாவுக்கு இதுகுறித்த தகவல் தெரியவந்தது. இதையடுத்து அவர் தனது ரசிகரிடம், ‘ருவிட்டர்’ வாயிலாக வருத்தம் தெரிவித்துள்ளார். 

அந்த பதிவில், “என்னை காண்பதற்காக வெகு தூரம் பயணித்து எனது வீட்டிற்கு சென்றிருக்கிறீர்கள். தயது செய்து இனி இது போல் செய்ய வேண்டாம். உங்களை சந்திக்க முடியாமல் போனது வருத்தமளிக்கிறது. இருப்பினும் ஒரு நாள் உங்களை நேரில் சந்திப்பேன் என நம்புகிறேன் என குறிப்பிட்டுள்ளார்.