படமாகிறது பாடகி சுசீலா வாழ்க்கை!!

இந்தியாவில் பயன்பாட்டில் உள்ள அனைத்து மொழிகளிலும் 50 ஆயிரத்துக்கு மேல் பாடல்கள் பாடி கின்னஸ் சாதனை படைத்த பிரபல சினிமா பின்னணி பாடகி பி.சுசிலா வாழ்க்கையை படமாக்கும் முயற்சிகள் மேற்கொள்ளப்பட்டுள்ளது. 

இந்த முயற்சிக்கு இசைப்புயல், ஒஸ்கார் நாயகன் இசையமைப்பாளர் ஏ.ஆர்.ரகுமானிடம் பி.சுசீலா உதவி கேட்டுள்ளார்.

இவ்விடயம் தொடர்பில் ருவிட்டரில் ரசிகர்களுடனான கலந்துரையாடலில் ஏ.ஆர்.ரகுமான் கருத்து தெரிவிக்கும் போது:- 

தென்னிந்திய திரையுலகின் தலைசிறந்த பாடகியான பி.சுசீலாவிடம் பேசினேன். அப்போது எனது 99 சாங்க்ஸ் படத்தை ஓ.டி.டியில் பார்க்கும்படி கேட்டுக்கொண்டேன். 

அவர் படத்தை பார்த்து விட்டு என்னை அழைத்து படம் நன்றாக இருக்கிறது. என்னுடைய வாழ்க்கை கதையையும் இதுபோலத்தான் படமாக்க வேண்டும். அதற்கு நீங்கள் உதவ முடியுமா? என்று கேட்டார். 

ஏழு தலைமுறையாக பல்லாயிரக்கணக்கான பாடல்களை பாடிய பி.சுசீலா எனக்கு பிடித்த பாடகி. அவர் எனது படத்தை பாராட்டியது மகிழ்ச்சி என்றார். இந்நிலையில் பி.சுசிலா வாழ்க்கை கதை படத்துக்கு ஏ.ஆர்.ரகுமான் இசையமைப்பாரா என்ற எதிர்பார்ப்பு ஏற்பட்டு உள்ளது.