மனைவிக்கு கொரோனா தொற்று, பிள்ளைகளுடன் ஆடைத் தொழிற்சாலை வாசலில் கணவன் போராட்டம்..! தொடரும் ஆடைத் தொழிற்சாலை அவலம்..

கிளிநொச்சி - அறிவியல் நகரில் உள்ள ஆடைத் தொழிற்சாலை ஒன்றின் முன்பாக 3 சிறுவர்களுடன் தந்தை ஒருவர் உணவு தவிர்ப்பு போராட்டத்தை நடத்தியுள்ளார்.

குறித்த தொழிற்சாலையில் நேற்று மேற்கொள்ளப்பட்ட அன்டிஜன் பரிசோதனையில் 24 பேருக்கு கொரோனா தொற்று அடையாளம் காணப்பட்டிருக்கிறது.

அவர்களில் ஒரு பெண்ணின் பிள்ளைகளும், கணவனுமே போராட்டத்தில் ஈடுபட்டுள்ளனர். அக்கராயன் மணியங்குளம் பகுதியை சேர்ந்த தன்னுடைய மனைவிக்கு 

நூற்றாண்டில்று பிற்பகல் கொரோனாத் தொற்று ஏற்பட்டுள்ளதாக சொல்லப்படுகின்ற போதிலும் தனக்கு குறித்த தகவல் அறிவிக்கப்படவில்லை என்றும் குழந்தைகளை வைத்துக்கொண்டு 

தாம் பல்வேறு நெருக்கடிகளை சந்திக்க நேருவதாகவும் தம்மை சுகாதார நடைமுறைகளுக்கு உட்படுத்த நடவடிக்கை எடுக்கவில்லை என்றும் தெரிவித்துதே போராட்டத்தில் ஈடுபடுவதாக குறித்த பெண்ணின் கணவன் தெரிவித்துள்ளார்.

கடந்த சில நாட்களிற்கு முன்னரே தற்போது உள்ள சூழலில் தொழிலுக்கு செல்ல வேண்டாம் என தாம் மறித்த நிலையில், தொழிற்சாலை ஊழியர்களால் நம்பிக்கையூட்டப்பட்டு பணிக்கு அழைக்கப்பட்டதாகவும் கணவர் தெரிவிக்கின்றார்.

குறித்த குடும்பத்தாருடன் ஆடைத் தொழிற்சாலை நிர்வாகத்தினர் பேச்சுவார்த்தையில் ஈடுபட எடுத்த முயற்சி நீண்ட நேரத்தின் பின்னர் அவரது மனைவியின் தொலைபேசி உரையாடலின் பின் முடிவுக்கு வந்தது.

குறித்த பெண் குணமடைந்து திரும்பும்வரை அக்குடும்பத்திற்கான உதவிகளை வழங்குவதாக தொழிற்சாலை நிர்வாகம் உறுதியளித்திருந்தது.

புதுக்குடியிருப்பு ஆடைத் தொழிற்சாலையில் ஒரே நாளில் 261 பேருக்கு கொரோனாத் தொற்று ஏற்பட்ட நிலையில் ஆடைத் தொழிற்சாலைகளை மூடுமாறு பலதரப்பட்ட தரப்புக்களாலும் 

கோரிக்கைகள் பரவலாக விடுக்கப்பட்டுவந்துள்ள சூழலிலும் இன்றுவரையில் ஆடைத் தொழிற்சாலைகளை மூட நடவடிக்கைகள் எடுக்கப்படவில்லை. 

இவ்வாறான சூழலில் பல குடும்பங்கள் பல்வேறு சிரமங்களை எதிர்கொண்டுவருகின்றமை குறித்து இனியாவது உரிய தரப்புக்கள் செவி சாய்க்குமா? என்று கேள்வி எழுப்புகின்றனர் சமூக ஆர்வலர்கள்.